"Meta" alış-verişi asanlaşdırmaq üçün süni intellektə yönəlir

Meta sosial şəbəkələrində alış-verişi asanlaşdırmaq üçün süni intellekt əsaslı yeni funksiyalar üzərində işləyir.

Valyuta.az xəbər verir ki, şirkət "Facebook" və "Instagram" platformalarında istifadəçilərə məhsullar barədə daha geniş məlumat təqdim edən yeni sistemi test etməyə başlayıb.

Məlumata görə, istifadəçi reklam üzərindən məhsula keçid etdikdə süni intellekt həmin məhsulla bağlı istifadəçi rəylərini qısa şəkildə ümumiləşdirərək təqdim edəcək. Bu, yüzlərlə rəyi oxumadan məhsul haqqında ümumi fikir əldə etməyə imkan verəcək.

Yeni funksiyada həmçinin brend haqqında məlumatlar, tövsiyə olunan məhsullar, mümkün endirimlər və “indi al” düyməsi də yer alacaq. İstifadəçilər alış prosesini tətbiqdən çıxmadan birbaşa tamamlaya biləcəklər.

Şirkət bu sistemi "Stripe" və "PayPal" kimi ödəniş tərəfdaşları ilə birlikdə hazırlayıb və gələcəkdə "Shopify" kimi platformalarla inteqrasiyanı genişləndirməyi planlaşdırır.

Bundan əlavə, Meta kontent yaradanlar üçün tərəfdaş proqramlarını da genişləndirir. Bu çərçivədə "Amazon", "eBay" və digər platformalarla əməkdaşlıq imkanları artırılacaq.