"Qeyri-dost ölkələr" Rusiyada 610 milyard dollar gəlirdən məhrum olub

“Vedomosti” nəşrinin hesablamalarına görə, "qeyri-dost ölkələr"ə məxsus şirkətlər 2022–2025-ci illər ərzində Rusiyada 610 milyard dollardan çox gəlir və ən azı 16 milyard dollar xalis mənfəət itirib.

Valyuta.az xəbər verir ki, məlumata əsasən, bu şirkətlər 2021-ci ildə Rusiyada 280 milyard dollardan çox gəlir əldə etdikləri halda, sonrakı dörd ildə illik orta hesabla 153 milyard dollar daha az qazanc əldə ediblər.

Rusiya bazarında fəaliyyət göstərən 3,4 min "qeyri-dost ölkə" şirkətindən 1,8 mini bazarı tərk edib və ya fəaliyyətini dayandırıb. Onlardan 1,3 mini maliyyə göstəricilərini açıqlayıb və bu məlumatlar təhlil olunub.

Ən çox bazarı tərk edənlər ABŞ şirkətləri olub – onların yalnız 38%-i fəaliyyətini davam etdirir. Avropa şirkətləri isə daha yüksək investisiya səviyyəsinə görə daha çox qalıb – onların 48%-i Rusiyada fəaliyyətini davam etdirir.

Ən yüksək çıxış göstəricisi İrlandiya (yalnız 13% qalıb), Finlandiya (19%), Norveç (22%) və İsveç (25%) şirkətləri arasında qeydə alınıb. Eyni zamanda Yunanıstan, Sloveniya, Slovakiya, Macarıstan və İtaliyadan olan şirkətlərin 70%-dən çoxu fəaliyyətini davam etdirib.

Sektorlar üzrə ən böyük gəlir itkiləri avtomobil sənayesində qeydə alınıb – 215 milyard dollar. İstehlak bazarı 115 milyard dollar, elektronika istehsalçıları isə 94 milyard dollar itki ilə üzləşib.

Maliyyə sektoru 28 milyard dollardan çox, IT və telekommunikasiya sahəsi isə 21 milyard dollar gəlir itirib.

Bununla yanaşı, dost ölkələrə məxsus bizneslər eyni dövrdə aktivlərini və gəlirlərini iki dəfə artırıb. 2024-cü ildə onların ümumi gəliri 42 milyard dolları keçib.

Paşa Məmmədli