ABŞ-da çoxmilyonluq sərvətə malik ailələrin sayı artır

Son illərdə ABŞ-da çoxmilyonluq sərvətə malik ailələrin sayı kəskin şəkildə artıb.

Valyuta.az xəbər verir ki, bu barədə “Wall Street Journal” nəşri yazıb.

Hazırda ölkədə sərvəti 30 milyon dollardan çox olan təxminən 430 min təsərrüfat mövcuddur. Onlardan təxminən 74 mininin sərvəti isə 100 milyon dolları keçir. Qeyd olunur ki, 1990-cı ildən bəri varlı ailələrin say artımı ölkə əhalisinin ümumi artım tempini üstələyib.

Nəşr ABŞ Federal Ehtiyat Sistemi və Princeton Universitetinin tədqiqatçılarına istinadən bildirir ki, bu artımın əsas səbəbləri fond bazarının yüksəlişi, fərdi investisiyaların genişlənməsi və pensiya yığımlarının artması, eləcə də kiçik və orta biznesin aktiv inkişafıdır.

Ən böyük aktiv həcmi hazırda “baby boomer” nəslinin (1946–1964-cü illərdə doğulanlar) əlində cəmlənib – ümumilikdə 88,5 trilyon dollar. İkinci yerdə X nəsli (1965–1980) qərarlaşıb – 45,4 trilyon dollar. Üçüncü yerdə isə 1946-cı ildən əvvəl doğulan “səssiz nəsil” gəlir – 20,8 trilyon dollar.

Daha gənc nəsillər – millenniallar və Z nəsli – birlikdə təxminən 18,25 trilyon dollar həcmində aktivlərə sahibdir.

“Wall Street Journal” qeyd edir ki, ev təsərrüfatlarının artan rifahı bahalı daşınmaz əmlak (10 milyon dollardan yuxarı) üzrə əməliyyatların çoxalmasında, premium seqmentə aid məhsulların – bahalı avtomobillər və lüks brendlərin – satışında, həmçinin biznes-klass və şəxsi təyyarələrlə səyahətlərin populyarlığının artmasında özünü göstərir.

Paşa Məmmədli