"OpenAI" "Sora" tətbiqini dayandırır

"OpenAI" mətn əsasında video yaradan "Sora" tətbiqini dayandırmaq qərarı verib.

Valyuta.az xəbər verir ki, "Sora"nın həm son istifadəçilər üçün nəzərdə tutulan tətbiqi, həm də inkişaf etdiricilər üçün təqdim edilən alətləri mərhələli şəkildə deaktiv ediləcək. Bununla yanaşı, "ChatGPT" daxilində planlaşdırılan video yaratma funksiyalarının da mövcud məhsul planları çərçivəsində həyata keçirilməyəcəyi bildirilir.

Qeyd edək ki, "Sora" istifadəçilərin yazdığı mətnləri qısa videolara çevirən sistem kimi təqdim olunmuşdu və realistik səhnələr, kamera hərəkətləri və fiziki modelləşdirməyə yaxın nəticələri ilə diqqət çəkmişdi. Lakin bu texnologiyanın yüksək hesablama gücü tələb etməsi onun geniş miqyasda tətbiqini çətinləşdirən əsas amillərdən biri olub.

Məlumata görə, qərar şirkətin strateji prioritetlərini yenidən müəyyənləşdirməsi ilə bağlıdır. "OpenAI" daha çox korporativ həllər, proqramlaşdırma alətləri və genişmiqyaslı süni intellekt sistemlərinə fokuslanmağı planlaşdırır.

Bununla yanaşı, "Sora"nın dayandırılmasında yüksək xərclərlə yanaşı, müəllif hüquqları və kontent sahibliyi ilə bağlı müzakirələrin də rol oynadığı qeyd olunur.

Sərvanə Rəmixanova