"PayPal" 53 milyard dollara satıla bilər

ABŞ-nin "Stripe" ödəniş xidməti və "Advent International" özəl investisiya şirkəti birlikdə "PayPal"ı 53 milyard dollardan çox məbləğə satın almağı nəzərdən keçirirlər. "Stripe" və "PayPal"ın birləşməsi təxminən 1.9 trilyon dollar illik dövriyyəsi olan dünyanın ən böyük ödəniş operatorunun yaranmasına səbəb ola bilər.

Oxu.Az xəbər verir ki, bu barədə "Reuters" agentliyi mənbələrə istinadən məlumat yayıb.

Məlumata görə, iyul ayında daxil olmuş təklifə əsasən, şirkətlər ödəniş xidmətinə bərabər paylarla sahib olmağı planlaşdırırlar. "Stripe" və "Advent International"ın "PayPal"ı almağı nəzərdən keçirdiyi bir səhmin qiyməti 60.5 dollar təşkil edir ki, bu da son bağlanış qiymətindən 28 faiz çoxdur.

"PayPal" xidməti 1990-cı illərin sonunda rəqəmsal ödənişlər bazarının ilk iştirakçılarından biri kimi yaradılıb. Son illərdə şirkət "Apple Pay" və "Google Pay" xidmətlərinin populyarlaşması fonunda artım tempinin zəifləməsi və rəqabətin güclənməsi ilə üzləşib. Bu il şirkətin bazar kapitallaşması 36 milyard dollar təşkil edib ki, bu da beş il əvvəlkindən 10 dəfə azdır.

Geriləməyə baxmayaraq, "PayPal"ın 430 milyondan çox alıcı hesabı var. Bu isə əsasən satıcılara yönəlmiş "Stripe" şirkətinə istehlakçılarla birbaşa əlaqələr qurmağa imkan verə bilər.