Çinin "CXMT" IPO-su 443 milyard dollarlıq dəyər hədəfi yaradır

Çinin yaddaş çipi istehsalçısı "ChangXin Memory Technologies" ("CXMT") 8,6 milyard dollarlıq IPO-ya hazırlaşır. 

Valyuta.az xəbər verir ki, şirkətin Şanxay birjasındakı debütündən sonra bazar dəyəri süni intellektə artan tələbat və Çinin texnoloji müstəqillik strategiyası fonunda 10 dəfəyədək arta bilər.

Çinin ən böyük DRAM yaddaş çipi istehsalçısı olan "CXMT" bu il Asiyanın ən böyük IPO-larından birini həyata keçirməyə hazırlaşır. Şirkət səhm başına 8,66 yuan qiymət müəyyən edib və IPO çərçivəsində 8,6 milyard ABŞ dolları cəlb etməyi planlaşdırır.

IPO qiymətləndirilməsinə əsasən, şirkətin bazar dəyəri hazırda 579,18 milyard yuan (təxminən 80,9 milyard ABŞ dolları) təşkil edir. 

"Shenzhen Deyuan Investment" şirkətinin fond meneceri Vu Jou bildirib ki, "CXMT" gələcəkdə "Samsung Electronics" və "SK Hynix" kimi qlobal yaddaş çipi istehsalçılarının bazar payına ciddi rəqib ola bilər. Onun sözlərinə görə, süni intellekt texnologiyalarının sürətli inkişafı və istehsal güclərinin artırılması şirkətin gələcək artımını dəstəkləyəcək.

Hazırda "CXMT" DRAM bazarında "SK Hynix", "Samsung Electronics" və "Micron"dan sonra dünyanın dördüncü ən böyük istehsalçısı hesab olunur.
IPO çərçivəsində toplanacaq vəsait istehsal xətlərinin genişləndirilməsi və texnologiyaların modernləşdirilməsinə yönəldiləcək. Əlavə səhm yerləşdirilməsi tam həyata keçirilərsə, ümumi vəsaitin 66,6 milyard yuana çatacağı gözlənilir.

Qeyd edək ki, süni intellekt əsaslı kompüterlər, robotlar və pilotsuz avtomobillərin yayılması yaddaş çiplərinə tələbatı artıracaq və bu da "CXMT"nin gələcək artımını dəstəkləyən əsas amillərdən biri olacaq.

Rəfiqə Abdin