İşçilər bir-birinin maaşını bilməlidir?

Bəzi şirkətlərdə işçilər bir-birinin maaşını bilmədikdə, bu, konfliktlərin qarşısını alır. Məsələn uzun müddət çalışan biri, yeni gələnin ondan artıq maaş aldığını öyrənərsə, bu, narazılıq hissi yaradır.

İşin bir də bu tərəfi var ki, deyirlər ki maaşların tam gizli saxlanması şəffaflığı azaldır. Əgər əməkhaqqı sistemi açıq və əsaslandırılmış olsa, bu, işçilər arasında güvəni artırır.

Maaşlar gizli saxlanmalıdır? Yoxsa işçilər bir-birinin maaşını bilməlidirmi?

Əmək qanunvericiliyi üzrə ekspert Nüsrət Xəlilov Valyuta.az-a bildirib ki, məsələyə qanunvericilik baxımından yanaşdıqda, şirkətdaxili əməkhaqqı məlumatlarının gizli saxlanılması və ya açıqlanması ilə bağlı konkret hüquqi norma mövcud deyil:

"Bu, müəssisənin daxili idarəetmə səlahiyyətinə aid məsələdir. Lakin komanda və əməkdaşlıq mühiti baxımından yanaşdıqda, əməkhaqqı sisteminin şəffaf olması bir sıra üstünlüklər yarada bilər. Əgər müəssisədə düzgün dərəcələndirməyə əsaslanan əməkhaqqı sistemi qurulubsa, yəni az işləyənə çox, çox işləyənə isə az ödəniş edilmirsə, bu halda əməkhaqqı məlumatlarının açıq olması həm şəffaflığı artırar, həm də işçilərin motivasiyasına müsbət təsir göstərə bilər. Məsələn, bir əməkdaş hazırda mütəxəssis vəzifəsində çalışır və aylıq maaşı 2000 manatdırsa, aparıcı mütəxəssis vəzifəsinə yüksəldikdə bu məbləğin 2500 manata qədər artacağı məlumdursa, bu, onun daha həvəsli və məqsədyönlü fəaliyyətinə təkan verə bilər. Belə şəraitdə əməkdaş digər işçilərin maaş məlumatlarını bildikdə, bu, demotivasiya yaratmaq əvəzinə, əksinə, öz inkişafı üçün əlavə stimul ola bilər".

"Nəticə etibarilə, müəssisədə əməkhaqqı sistemi ədalətli və şəffaf şəkildə qurulubsa, maaşların açıq olması işçilər arasında narazılıq yaratmır, əksinə, vəzifə artımı və karyera inkişafına qarşı daha ciddi yanaşmanı təşviq edir", - deyə ekspert vurğulayıb.

Mayya Hüseynova