2026-cı il üçün Bakıda ən yaxşı startaplar

2026-cı il üzrə Bakı şəhərində fəaliyyət göstərən ən yaxşı startapların reytinqi açıqlanıb.

Valyuta.az xəbər verir ki, siyahıya müxtəlif texnologiya, elektron ticarət, maliyyə texnologiyaları və logistika sahələrində fəaliyyət göstərən startaplar daxil edilib.

1-ci yer - “Keepface”
“Keepface” brendlərin influencer marketinqi, işçi və müştəri dəstək kampaniyalarını vahid platformada idarə etməsinə imkan verən alətdir. Platforma influencerlərlə genişmiqyaslı kampaniyaların təşkili, kontentin koordinasiyası və nəticələrin real vaxtda ölçülməsi imkanını yaradır. Sistem həmçinin analitika və saxta izləyicilərin aşkarlanması texnologiyası ilə influencerlərin etibarlılığını qiymətləndirir. Startap Bakı üzrə 1-ci, Şərqi Avropa üzrə 603-cü, qlobal reytinqdə isə 18 706-cı yeri tutur.

2-ci yer - “Clopos”
“Clopos” bulud əsaslı POS və restoran idarəetmə həlləri təqdim edən platformadır. Sistem satış, personal idarəetməsi, anbar uçotu və pul axınlarının idarə olunması kimi prosesləri əhatə edir və internet olmadan da istifadə oluna bilir. Startap Bakı üzrə 2-ci, Şərqi Avropa üzrə 753-cü, dünya üzrə isə 22 838-ci yerdə qərarlaşıb.

3-cü yer - “Algorithmics”
“Algorithmics” təhsil texnologiyaları sahəsində fəaliyyət göstərən platformadır və uşaqlar üçün proqramlaşdırma və rəqəmsal bacarıqlar üzrə təhsil proqramları təqdim edir. Startap Bakı üzrə 3-cü, Şərqi Avropa üzrə 869-cu, dünya üzrə isə 26 439-cu yerdədir.

4-cü yer - “Payriff”
“Payriff” bizneslər üçün onlayn ödənişlərin qəbulu və elektron ticarət həlləri təqdim edən platformadır. Startap Bakı üzrə 4-cü, Şərqi Avropa üzrə 1023-cü, dünya üzrə isə 31 236-cı yeri tutur.

5-ci yer - “Glorri”
“Glorri” işə qəbul prosesinin avtomatlaşdırılması üçün proqram platformasıdır və şirkətlərə bu prosesi daha səmərəli idarə etməyə kömək edir. Startap Bakı üzrə 5-ci, Şərqi Avropa üzrə 1125-ci, dünya üzrə isə 33 840-cı yerdə qərarlaşıb.

6-cı yer - “KoliPlus”
“KoliPlus” Azərbaycanda fəaliyyət göstərən logistika xidmətidir və Türkiyə, ABŞ, Almaniya, Çin, İngiltərə və BƏƏ-dən Azərbaycana bağlama və yüklərin çatdırılmasını təmin edir. Startap Bakı üzrə 6-cı, Şərqi Avropa üzrə 1208-ci, dünya üzrə isə 36 137-ci yerdədir.

7-ci yer - “Tutorlab”
“Tutorlab” onlayn təhsil xidmətləri və rəqəmsal öyrənmə həlləri təqdim edən EdTech platformasıdır. Startap Bakı üzrə 7-ci, Şərqi Avropa üzrə 1540-cı, dünya üzrə isə 44 466-cı yerdə qərarlaşıb.

8-ci yer - “Epoint.az”
“Epoint.az” elektron ticarət və biznes proseslərinin idarə olunması üçün texnoloji həllər təqdim edir. Platforma xüsusilə kiçik və orta bizneslərin fəaliyyətinin optimallaşdırılmasına kömək edir. Startap Bakı üzrə 8-ci, Şərqi Avropa üzrə 1873-cü, dünya üzrə isə 52 712-ci yeri tutur.

9-cu yer - “Push30”
“Push30” idman və fitness xidmətlərinin onlayn satışı üçün yaradılmış platformadır və ölkədə fitness mədəniyyətinin inkişafına töhfə verməyi hədəfləyir. Startap Bakı üzrə 9-cu, Şərqi Avropa üzrə 1926-cı, dünya üzrə isə 54 045-ci yerdə qərarlaşıb.

10-cu yer - “Imajin”
“Imajin” virtual və artırılmış reallıq texnologiyaları sahəsində fəaliyyət göstərən platformadır və innovativ rəqəmsal həllər hazırlayır. Startap Bakı üzrə 10-cu, Şərqi Avropa üzrə 2240-cı, dünya üzrə isə 61 659-cu yeri tutur.

11-ci yer - “Recepta”
“Recepta” kartla edilən alışlar üçün rəqəmsal qəbzlərin avtomatik yaradılması və saxlanmasını təmin edən platformadır. Sistem kağız qəbzlərə ehtiyacı aradan qaldıraraq həm xərclərin azalmasına, həm də ekoloji baxımdan daha davamlı yanaşmaya kömək edir. Startap Bakı üzrə 11-ci, Şərqi Avropa üzrə 2329-cu, dünya üzrə isə 63 719-cu yerdə qərarlaşıb.

Sərvanə Rəmixanova