Özbəkistanın “fintech” şirkətinin dəyəri 2,3 milyard dollara çatdı

Özbəkistanın “fintech” şirkəti “Uzum”un dəyəri son yeddi ayda investorların ölkənin inkişaf edən rəqəmsal iqtisadiyyatına marağının artması fonunda təxminən 53% artaraq 2,3 milyard dollara çatıb.

Valyuta.az xəbər verir ki, bu qiymətləndirmə Omanın suveren sərvət fondlarının rəhbərlik etdiyi 131,5 milyon dollarlıq investisiya nəticəsində formalaşıb. İnvestisiya raundunda mövcud investorlar – "Tencent", "VR Capital" və "FinSight Ventures" də iştirak edib. Bu raund 81,5 milyon dollar səhm investisiyasından və 50 milyon dollar konvertasiya edilə bilən maliyyələşmədən ibarətdir. Startap 2026-cı ilin ikinci yarısında və ya 2027-ci ilin əvvəlində planlaşdırılan IPO-dan əvvəl 250–300 milyon dollar cəlb etməyi hədəfləyir.

Xatırladaq ki, ötən ilin avqustunda "Uzum" 1,5 milyard dollar qiymətləndirmə ilə 65,5 milyon dollar investisiya cəlb etmişdi. Şirkət 2024-cü ilin martında ölkənin ilk “unicorn”u (dəyəri 1 milyard dollardan çox olan startap) olmuşdu.

2022-ci ildə qurulan "Uzum" qısa müddətdə ölkənin aparıcı “rəqəmsal ekosistem”lərindən birinə çevrilib. Şirkət öz fəaliyyətində elektron ticarət, ödəniş xidmətləri və istehlak kreditlərini bir platformada birləşdirir.

Nuranə Mübariz