"Toksik şirkətləri kənardan da tanımaq olar" - Əsas siqnallar

Ayşən Həmidsoy

   İnsan resursları mütəxəssisi

İş axtarışı prosesində namizədlər adətən diqqəti yalnız özlərini ən yaxşı formada təqdim etməyə yönəldirlər. Lakin nəzərdən qaçırılan mühüm bir məqam var: müsahibə və işə qəbul prosesi eyni zamanda şirkətin daxili mədəniyyətinin aynasıdır. Toksik mühitin mövcudluğunu anlamaq üçün işə başlamağı gözləmək lazım deyil, bəzi əlamətlər hələ kənardan müşahidə edilə bilir.

Bəs əsas “qırmızı bayraqlar” hansılardır?

Uzun müddət bağlanmayan vakansiyalar və uzun işə qəbul müddəti

Bəzi şirkətlərin vakansiya elanları aylarla aktiv qalır və ya qısa fasilələrlə yenidən yayımlanır. İlk baxışda bu, uyğun namizəd tapılmaması kimi görünə bilər. Lakin çox zaman səbəb daxili problemlərlə bağlı olur:

Qeyri-real tələblər: Bir neçə fərqli vəzifənin funksiyaları bir nəfərin üzərinə qoyulur.

Aşağı əməkhaqqı: Yüksək gözləntilərlə təklif olunan məvacib arasında ciddi uyğunsuzluq yaranır.

Əsassız meyarlar: Namizədin real bacarıqları əvəzinə, vəzifənin mahiyyəti ilə əlaqəsi olmayan detallara üstünlük verilir.

Yüksək işçi axını

Toksik mühitin əsas göstəricilərindən biri davamlı işçi dövriyyəsidir. Əgər eyni vəzifə üzrə qısa müddət ərzində dəfələrlə vakansiya elan edilirsə, problem çox güman ki, mütəxəssislərdə deyil, daxili idarəetmə sistemindədir.

Sağlam, psixoloji təhlükəsizliyin təmin olunduğu və inkişaf imkanlarının mövcud olduğu mühitlərdə əməkdaşlar işi asanlıqla tərk etmirlər. Yüksək işçi axını isə idarəetmədə boşluqlara və işçilərin dəyərsiz hiss etməsinə işarə edə bilər.

Qeyri-şəffaf kommunikasiya və proseslərdə xaos

Müasir əmək bazarında şəffaf və sistemli proseslər mühüm əhəmiyyət daşıyır. İşə qəbul mərhələsində aşağıdakı hallar müşahidə olunursa, bu, daxili idarəetmədə problemlərin ola biləcəyini göstərir:

Müsahibə mərhələlərinin aydın izah edilməməsi;

Rəsmi geridönüşlərin uzun müddət gecikməsi;

Müsahibə zamanı verilən məlumatlarla real iş şərtləri arasında uyğunsuzluq.

Müsahibə zamanı sərhədlərin pozulması

Müsahibədə verilən suallar və ünsiyyət tərzi şirkətin işçiyə yanaşmasını açıq şəkildə əks etdirir. Şəxsi həyata həddindən artıq müdaxilə, iş-həyat balansına hörmətsizlik siqnalları və ya HR/Rəhbərin yuxarıdan-aşağı ünsiyyət forması gələcəkdə toksik idarəetmə modelinin mövcud ola biləcəyini göstərir.

Nəticədə sağlam iş mühiti yalnız cəlbedici əməkhaqqı ilə deyil, işçiyə göstərilən hörmət, düzgün qurulmuş idarəetmə sistemi və psixoloji rahatlıqla müəyyən olunur. Kənardan görünən bu əlamətləri vaxtında təhlil etmək namizədləri gələcək peşəkar tükənmə riskindən qoruya bilər.