Mark Kubanın 5 ən yaxşı passiv gəlir ideyası

Mark Kuban siyasətdən investisiyaya qədər müxtəlif mövzularda açıq fikirlərini bölüşməsi ilə tanınır. Öz zəhməti ilə milyarder olan Kuban insanların maliyyə vəziyyətlərini yaxşılaşdırmaq və hətta varlanmaq üçün nə etməli olduqları barədə məsləhətlərini çəkinmədən paylaşır.

Bu yanaşma qismən milyarder investor Uorren Baffetin strategiyasına bənzəyir. Baffet uzun illərdir belə deyir: “Diversifikasiya bilməməzlikdən qorunmaq üçündür. Nə etdiyini bilən insanlar üçün isə çox da məna daşımır.”

Kuban bəzən analitiklərin əksəriyyətinin fikirlərinə zidd olan və ya kifayət qədər riskli hesab edilən investisiya imkanlarını dəstəkləyir. Onun fikrincə, əgər insan nə etdiyini yaxşı bilirsə, risk əhəmiyyətli dərəcədə azalır. Mark Kuban tam passiv investor kimi tanınmasa da, o, bizneslərinə fokuslanarkən paralel olaraq böyüyə bilən və əlavə gəlir gətirə bilən investisiyaları seçir.

Aşağıda Kubanın özünün investisiya etdiyi və passiv gəlir potensialı olan sahələr təqdim olunur:

1. Dividend Ödəyən Səhmlər

Kubanın fikrincə, dividendlər investorların cibinə real pul gətirir və dərhal passiv gəlir yaradır. Dividend ödəməyən səhmlərdə isə dəyər daha çox bazar göstəricilərinə əsaslanan nəzəri anlayışdır.
Dividend ödəyən səhmlər passiv gəlirə ən yaxın investisiya növlərindən biridir. Bu səhmlər həm qiymət artımı potensialına malikdir, həm də rüblük dividend ödəmələri sayəsində bazar zəiflədiyi dövrlərdə belə gəlir təmin edə bilir.

2. Süni İntellekt (AI) Şirkətləri

Ümumilikdə Kuban fərdi səhmlərə böyük həvəslə investisiya etməyin tərəfdarı deyil. Onun sözlərinə görə: “Dividend ödəməyən səhmlər bir növ beysbol kartları kimidir — onların dəyəri sadəcə kimisə həmin qiymətə almağa razı sala bildiyiniz qədərdir.”
Lakin süni intellekt sahəsində fəaliyyət göstərən şirkətlərə gəldikdə Kubanın fikri dəyişir. O hesab edir ki, gələcəkdə demək olar ki, bütün şirkətlər fəaliyyətlərini davam etdirmək üçün AI texnologiyalarından istifadə etməli olacaq.
AI səhmləri adətən dərhal gəlir gətirmir, lakin onların qiyməti kəskin yüksələrsə, gələcəkdə böyük qazanc mənbəyinə çevrilə bilər. Bu müddətdə investorlar sadəcə portfellərində saxlayaraq passiv şəkildə gözləyə bilərlər.

3. Kriptovalyuta

Kriptovalyuta klassik passiv gəlir mənbəyi deyil. Daha çox yüksək riskli, lakin böyük qazanc potensialı olan investisiya hesab edilir. Kuban bildirir ki, kriptovalyutaların dəyəri qismən smart contract (ağıllı müqavilə) texnologiyasına əsaslanır. Onun fikrincə, bu texnologiya gələcəkdə geniş istifadə ediləcək tətbiqlərin yaranmasına səbəb olacaq. Bu səbəbdən funksional smart contract texnologiyasına əsaslanan kriptovalyutalar uzunmüddətli perspektivdə böyük dəyər qazana bilər.
Bununla belə, Kuban investorları xəbərdar edir ki, kriptovalyutalara yalnız itirməyə hazır olduqları məbləği yatırmalıdırlar. Onun sözlərinə görə: “Kriptovalyutaya yalnız macəraçı ruhunuz varsa və böyük risk almağa hazırsınızsa investisiya edin.”

4. S&P 500 İndeks Fondu

Kuban və Baffet kriptovalyutalar haqqında fərqli fikirdə olsalar da, S&P 500 indeks fondları məsələsində eyni mövqedədirlər. Bu indeks uzunmüddətli perspektivdə orta hesabla ildə təxminən 10% gəlir təmin edib. Müntəzəm və uzunmüddətli investisiya nəticəsində bu fondlar ciddi passiv sərvət yarada bilər.

5. Özəl Şirkətlər

“Shark Tank” verilişinin əsas investorlarından biri kimi Kuban tez-tez kiçik özəl şirkətlərə investisiya edir. Bu investisiyalar yüksək risk və yüksək gəlir potensialına malikdir. Əlbəttə ki, Kubanın belə imkanlara çıxışı adi investorlarla müqayisədə daha genişdir.
Lakin adi investorlar da crowdfunding platformaları və ya xüsusi investisiya fondları vasitəsilə özəl şirkətlərə sərmayə qoya bilərlər. Bu halda investisiya tam passiv ola və gələcəkdə gəlir gətirə bilər.

Tənzilə Ağabalayeva