"FED" iqtisadi islahatlar üçün 5 yeni işçi qrupu yaratdı

ABŞ Federal Ehtiyat Sisteminin (FED) sədri Kevin Warsh mərkəzi bankın fəaliyyətinin yenidən formalaşdırılması məqsədilə yaradılan beş yeni müstəqil işçi qrupunun tərkibini açıqlayıb.

Valyuta.az xəbər verir ki, qruplarda iqtisadçılarla yanaşı texnologiya və biznes dünyasının tanınmış simaları da yer alıb. İşçi qruplarının ilin sonunadək "FED"in gələcək siyasətinə dair tövsiyələr hazırlaması gözlənilir.

Kommunikasiya siyasəti

Bu qrupa ABŞ Maliyyə Nazirliyinin sabiq rəsmisi və Nyu-York Federal Ehtiyat Bankının keçmiş rəhbərlərindən Piter R. Fişer (Peter R. Fisher), Braziliya Mərkəzi Bankının keçmiş prezidenti Arminio Fraqa (Arminio Fraga) və İngiltərə Bankının keçmiş rəhbəri Mervin Kinq (Mervyn King) daxildir.

Balans siyasəti

Balans siyasəti üzrə yaradılan işçi qrupunda Harvard Universitetinin professoru Karen Daynan (Karen Dynan), Hindistan Mərkəzi Bankının keçmiş rəhbəri Raquram Rajan (Raghuram Rajan) və FED-in sabiq İdarə Heyətinin üzvü Ceremi Steyn (Jeremy Stein) təmsil olunur.

İşçi qrupunun əsas vəzifəsi FED-in balans hesabatının və aktiv portfelinin gələcəkdə necə idarə olunmasına dair tövsiyələr hazırlamaqdır.

Məlumatların təhlili

Məlumatların təhlili üzrə işçi qrupunda Harvard Universitetinin professoru Rac Çetti (Raj Chetty), "Walmart"ın keçmiş baş icraçı direktoru Duq MakMillon (Doug McMillon) və Çikaqo Universitetinin professoru Kevin Mörfi (Kevin Murphy) təmsil olunur.

İşçi qrupu FED-in iqtisadiyyatı qiymətləndirmək üçün istifadə etdiyi məlumatların daha da təkmilləşdirilməsi ilə bağlı tövsiyələr hazırlayacaq.

Süni intellekt və əmək bazarı

Ən çox diqqət çəkən işçi qruplarından biri məhsuldarlıq və məşğulluq istiqaməti üzrə yaradılıb. Qrupun tərkibində "Andreessen Horowitz" vençur fondunun həmtəsisçisi Mark Andreessen (Marc Andreessen), Stanford Universitetinin professoru Çarlz İ. Cons (Charles I. Jones) və "Xbox"un baş icraçı direktoru Aşa Şarma (Asha Sharma) yer alır.

İşçi qrupu süni intellekt və digər yeni texnologiyaların məhsuldarlığa, məşğulluğa və iqtisadi artıma təsirini araşdıraraq FED-ə müvafiq tövsiyələr təqdim edəcək.

İnflyasiya strategiyası

İnflyasiya siyasəti üzrə işçi qrupunda Harvard Universitetinin professoru Qreq Menkyu (Greg Mankiw), Nobel mükafatı laureatı Tomas C. Sarcent (Thomas J. Sargent) və Beynəlxalq Hesablaşmalar Bankının (BIS) sabiq baş iqtisadçısı Uilyam Uayt (William White) təmsil olunur.

İşçi qrupu FED-in inflyasiya hədəfləmə siyasətini və qiymət sabitliyinə yanaşmasını yenidən qiymətləndirərək bu istiqamətdə tövsiyələr hazırlayacaq.

FED-in sədri Kevin Varş (Kevin Warsh) daha əvvəl bildirmişdi ki, iqtisadiyyatın dəyişən şərtləri fonunda qurumun həm inflyasiyaya yanaşmasına, həm də maliyyə bazarları ilə kommunikasiya siyasətinə yenidən baxılması vacibdir. Gözlənilir ki, yeni yaradılan işçi qruplarının hazırlayacağı tövsiyələr gələcəkdə FED-in pul-kredit siyasətinin formalaşdırılmasına təsir göstərəcək.

Sərvanə Rəmixanova