"OpenAI" rəhbəri Fici Simo vəzifəsindən ayrılır

"OpenAI" şirkətinin məhsul və biznes üzrə rəhbəri Fici Simo xroniki xəstəliyinin ağırlaşması səbəbindən vəzifəsindən ayrıldığını açıqlayıb.

Valyuta.az xəbər verir ki, o, bundan sonra şirkətdə yarımştat məsləhətçi kimi fəaliyyət göstərəcək.

Fici Simo cümə axşamı "X" sosial şəbəkəsində paylaşdığı açıqlamada bildirib ki, xroniki xəstəliyinin ciddi şəkildə ağırlaşması səbəbindən sağalma prosesinə diqqət yetirmək qərarına gəlib.

Simo 2019-cu ildə Postural Ortostatik Taxikardiya Sindromu (POTS) diaqnozu aldığını xatırladaraq qeyd edib ki, son illər ərzində həkim müayinələri, müalicə prosesi, sığorta məsələləri və xəstəliyin yaratdığı görünməyən çətinliklərlə mübarizə aparıb.

O, 2026-cı ilin aprel ayında tibbi məzuniyyətə çıxmışdı. Həmin dövrdə məhsul istiqamətinə rəhbərlik "OpenAI"nin prezidenti Qreq Brokmana həvalə edilmişdi.

"Sağlamlığımı prioritet seçdiyim üçün məzuniyyətə çıxanda bir çox insan bunu cəsarətli addım adlandırdı. Əslində isə bu qərarı yalnız indi verirəm, çünki əvvəllər bunu dəfələrlə etməli olduğum halda etməmişdim", – deyə Simo bildirib.

O əlavə edib ki, bundan sonra "OpenAI"də yarımştat məsləhətçi kimi fəaliyyətini davam etdirəcək.

Qeyd edək ki, Fici Simo 2025-ci ilin may ayında "Instacart" şirkətinin baş icraçı direktoru vəzifəsindən ayrılaraq "OpenAI"yə qoşulmuşdu. 

Tənzilə Ağabalayeva