Əmlak sahibləri daha çox nəyi sığortalayır - Evi, yoxsa avtomobili?

Cari ilin ilk 4 ayında sığorta şirkətləri əmlakın yanğından və digər risklərdən sığortası üzrə yığımlarını 37,1% və ya 9 milyon 29 min manat artırıblar.

Belə ki, sözügedən dövrdə şirkətlər 33 milyon 371 min manat sığorta yığımı ediblər. Ötən ilin eyni dövründə bu rəqəm 24 milyon 342 min manat olub.

Bu sığorta növü üzrə ödənişlərdə isə illik müqayisədə 25,6% və ya 234 min manat azalma qeydə alınıb. Hesabata görə, bu ilin ilk 4 ayında 679 min manat ödəniş olub, ötən ilin eyni dövründə isə bu rəqəm 913 min manat təşkil edib.

Avtonəqliyyat vasitələrinin sığortası üzrə yığımlar ilk 4 ayda 23 milyon 40 min manat olub. Bu, illik müqayisədə 1,2% və ya 265 min manat artım deməkdir. Ötən ilin eyni dövründə bu göstərici 22 milyon 775 min manat idi.

Ödənişlər isə illik müqayisədə 32,3% və ya 2 milyon 986 min manat artaraq 12 milyon 242 min manat təşkil edib. Ötən ilin eyni dövründə bu göstərici 9 milyon 256 min manat olub.

Beləliklə, ilin ilk 4 ayında əmlakın yanğından və digər risklərdən sığortası üzrə yığımlar 9 milyon manatdan çox artsa da, ödənişlər 234 min manat azalıb. Avtonəqliyyat vasitələrinin sığortasında isə yığımlar cüzi artsa da, ödənişlər təxminən 3 milyon manat yüksəlib.

Nəticəyə görə, ilin ilk 4 ayında əmlakın yanğından və digər risklərdən sığortası üzrə yığımlar avtonəqliyyat vasitələrinin sığortası üzrə yığımları 10,3 milyon manat üstələyib

Sərvanə Rəmixanova