Azərbaycanda brauzer bazarının 81%-i “Chrome”un payına düşür

Azərbaycanda brauzerlərin bazar payı üzrə aparıcı mövqedə olan “Chrome” platformasının göstəricilərində ötən ilin müvafiq dövrü ilə müqayisədə azalma qeydə alındığı halda, “Safari” və “Samsung Internet” platformalarında artım müşahidə olunub.

Valyuta.az xəbər verir ki, 2026-cı ilin may ayında “Chrome” brauzerinin ölkə üzrə bütün platformalarda (kompüter, mobil cihazlar və planşetlərdə) bazar payı 81.04% təşkil edib. Bu, 2025-ci ilin may ayı ilə müqayisədə 1.4 faiz bəndi azdır. Belə ki, ötən ilin eyni ayında bu göstərici 82.44% olub.

Bazar payına görə növbəti sırada qərarlaşan “Safari” platformasında isə ötən illə müqayisədə artım qeydə alınıb. 2025-ci ilin may ayında “Safari”nin bazar payı 8.19% olduğu halda, 2026-cı ilin may ayında bu göstərici 0.06 faiz bəndi artaraq 8.25%-ə yüksəlib.

Qeyd edək ki, hesabatda yerli rəqəmsal bazarda digər populyar brauzer olan “Samsung Internet”in də göstəriciləri yer alıb. Məlumata görə, sözügedən brauzerin bazar payı 2025-ci ilin may ayındakı 2.94%-dən, 2026-cı ilin may ayında 3.4%-ə yüksəlib.

Rəfiqə Abdin