"Apple" öz qaydasını pozdu: "Siri"nin yeni beyni "Google" və "Nvidia"ya tapşırılır

"Apple" səsli köməkçisi "Siri"ni süni intellektlə gücləndirmək üçün indiyə qədərki “tam nəzarət” strategiyasından kənara çıxaraq "Google" və "Nvidia" ilə əməkdaşlığa gedib. 

Valyuta.az xəbər verir ki, "The Information"un hesabatına görə, şirkət WWDC tədbirində təqdim ediləcək yeni "Siri" funksiyaları üçün "Google"un bulud infrastrukturu və "Gemini" süni intellekt modelindən istifadə etməyi planlaşdırır.

İddialara əsasən, "Siri" bəzi mürəkkəb sorğuları cavablandırmaq üçün "Google"un məlumat mərkəzlərində işləyən "Gemini" modelinə yönləndiriləcək. Bu sistem "Apple"ın öz ekosistemindən kənar ilk genişmiqyaslı süni intellekt inteqrasiyalarından biri kimi qiymətləndirilir.

"Apple" istifadəçi məxfiliyini qorumaq üçün "Google" məlumat mərkəzlərində "Nvidia"nın ən yeni "Blackwell B200" çiplərindən istifadə etməyi planlaşdırır. Bu çiplər məlumatların işlənməsi zamanı xarici müdaxiləni məhdudlaşdıran xüsusi aparat səviyyəli təhlükəsizlik mexanizmlərinə malikdir.

Şirkət bu yanaşma ilə məlumatların hətta emal mərhələsində belə şifrələnməsini təmin etməyi hədəfləyir. Bu addım "Apple"ın uzun illərdir tətbiq etdiyi “bütün texnologiyanı öz daxilində idarə etmək” siyasətindən əhəmiyyətli bir dönüş kimi qiymətləndirilir. Şirkət adətən həm hardware, həm də proqram təminatını tam nəzarətdə saxlayırdı.

Bununla belə, "Apple"ın əvvəlcədən elan etdiyi “Private Cloud Compute” sisteminin "Google" və "Nvidia" əsaslı yeni "Siri" arxitekturası ilə necə uyğunlaşdırılacağı hələlik tam aydın deyil.

Paşa Məmmədli