Azərbaycanda xarici turistlərin çəkdikləri xərclər 206 milyondan çox azalıb

Bu ilin yanvar-aprel aylarında turizm məqsədilə Azərbaycana səfər etmiş əcnəbilərin və vətəndaşlığı olmayan şəxslərin ölkədə çəkdikləri xərclərin həcmində ötən ilin müvafiq dövrü ilə müqayisədə azalma qeydə alınıb.

Valyuta.az xəbər verir ki, 2026-cı ilin ilk 4 ayında xarici turistlərin ümumi xərcləri 696 milyon 666.1 min manat təşkil edib. Bu, 2025-ci ilin yanvar-aprel ayları ilə müqayisədə 206 milyon 452,9 min manat və ya 22.85% azdır. Belə ki, ötən ilin eyni dövründə bu göstərici 903 milyon 119.0 min manat olub.

Hesabat dövründə xarici qonaqların ən çox vəsait ayırdığı nəqliyyat xidmətlərində xərclər 101 milyon 71,1 min manat və ya 24.12% azalaraq 317 milyon 866.3 min manata düşüb. 2025-ci ilin müvafiq dövründə həmin göstərici 418 milyon 937.4 min manat olub.

Ən kəskin geriləmə isə yerləşmə sektorunda qeydə alınıb. Belə ki, ötən ilin ilk 4 ayında əcnəbilər yerləşməyə 186 milyon 927.4 min manat xərclədiyi halda, cari ilin eyni dövründə bu göstərici 60 milyon 784,9 min manat və ya 32.51% azalaraq 126 milyon 142.5 min manata enib. 

Turistlərin qidalanma xərcləri isə 31 milyon 559,7 min manat və ya 19.35%  azalaraq 163 milyon 050.8 min manatdan 131 milyon 491.1 min manata geriləyib.

Məlumata görə, sözügedən dövrdə mədəniyyət sahəsinə çəkilən xərclər 914,4 min manat və ya 18.72%  azalaraq 3 milyon 969.5 min manata, turizm zərflərinin (paketlərinin) alınmasına xərclənən vəsait isə 80,8 min manat və ya 20.07% azalaraq 321.7 min manata düşüb.

Rəfiqə Abdin