"Meta" səbəbini izah etmədən hesabları bağlayır: Müstəqil şuradan sərt tənqid

"Meta"nın siyasət tövsiyələri verən müstəqil nəzarət şurası şirkətin hesab bağlama proseslərində ciddi problemlər aşkar edib. 

Valyuta.az xəbər verir ki, şuranın açıqladığı hesabatda qeyd olunur ki, "Meta" bəzi hesabları bağlayarkən kifayət qədər izahat vermir, istifadəçilərin şikayət mexanizmlərinə çıxışı məhdud olur və dəstək xidmətləri yetərsiz işləyir.

Şura araşdırmanı bu ilin əvvəlində bir jurnalistə yönəlmiş zorakılıq təhdidləri ilə bağlı bir hadisə üzərindən başladıb. Araşdırma nəticəsində həmin hesabın daimi olaraq bağlanması qərarı düzgün hesab edilib. Lakin ümumi təhlil zamanı daha geniş sistem problemləri üzə çıxıb.

Hesabata görə, "Meta" hesablarla bağlı iki fərqli moderasiya sistemi tətbiq edir. Birincisi qayda pozuntularına görə xəbərdarlıq və cəza sistemi, digəri isə ağır pozuntu hesab edilən hallarda hesabın dərhal və daimi bağlanmasıdır.

Şura bildirir ki, bu iki sistem arasındakı sərhədlər aydın deyil və hansı pozuntunun hansı cəzanı doğurduğu açıq şəkildə göstərilmir. Bu da istifadəçilərin qərarların səbəbini anlamasını çətinləşdirir.

"Meta Verified" adlı ödənişli abunəlik çərçivəsində istifadəçilərə e-poçt və ya canlı çat vasitəsilə dəstək təklif olunsa da, hesabatda qeyd edilir ki, hesabı bağlanan bir çox istifadəçi real yardım ala bilmir.

Oxşar şikayətlər uzun illərdir "Facebook" və "Instagram"da davam edir. Xüsusilə avtomatik moderasiya sistemlərinin geniş istifadəsi istifadəçilərin qərarlara qarşı şirkət daxilində real müraciət imkanlarını zəiflədir.

Çoxsaylı istifadəçilər hesablarının niyə bağlandığını öyrənə bilmədiklərini bildirir.

Keçmiş yanğınsöndürən və səhiyyə işçisi Riçard Pauvels hesabının onun brendi ilə bağlı fəaliyyət göstərərkən bağlandığını və səbəbin açıqlanmadığını deyib. O, hansı paylaşımın problem yaratdığını bilmədiyini və qərarın insan tərəfindən yoxlanmadığını iddia edib.

Oxşar şikayətlər bəzi hallarda ciddi məzmun pozuntuları ilə bağlı da ortaya çıxır. İstifadəçilər onlara konkret sübut və ya nümunə göstərilmədiyini bildirirlər.

Bəzi biznes sahibləri və kontent istehsalçıları hesablarının bağlanmasının birbaşa maddi zərərə səbəb olduğunu bildirir. Məsələn, yüz minlərlə izləyicisi olan bəzi səhifələrin bir gecədə bağlandığı və bunun iş fəaliyyətini dayandırdığı qeyd olunur.

"Meta Verified" istifadəçilərinin bir qismi isə ödəniş etmələrinə baxmayaraq kifayət qədər dəstək ala bilmədiklərini iddia edir.

Müstəqil şura "Meta"ya istifadəçilər üçün hesab vəziyyətini göstərən xüsusi panel yaradılmasını tövsiyə edir. Bu paneldə əvvəlki pozuntular, cəzalar və şikayət imkanları açıq şəkildə göstərilməlidir.

Həmçinin qərar bildirişlərində pozuntunun nə vaxt baş verdiyi, hansı qaydanın pozulduğu və hansı cəzanın tətbiq edildiyi kimi məlumatların daha şəffaf şəkildə təqdim olunması tələb edilir.

"Meta" şuranın qərarını müsbət qarşıladığını açıqlayıb. Şirkət bildirib ki, konkret iş üzrə hesabın bağlanması qərarı şura tərəfindən də təsdiqlənib və təqdim olunan tövsiyələr qiymətləndiriləcək.

Paşa Məmmədli