"Bravo" marketdə endirim "yanlışlığı": 4.4 AZN-lik məhsulu 9.27 AZN-ə satdılar

Böyük supermarket şəbəkələrində bəzi məhsulların vitrində göstərilənlə kassadakı qiymətinin üst-üstə düşməməsi problemi hələ də davam edir. Market işçiləri bunu texniki səhv və ya diqqətsizliklə izah etsələr də, son nəticədə bu vəziyyət kassada ödəniş zamanı məbləğə diqqət etməyən yüzlərlə müştərinin “cibinə girmək” kimi qiymətləndirilir.

Oxşar hadisələrdən biri də “Bravo” supermarketlər şəbəkəsində yaşanıb. Belə ki, “Bravo”dan alış-veriş edən jurnalist Bahadur Seyidov etiketdə endirimli göstərilən məhsulun kassada fərqli qiymətlə təqdim olunmasından şikayətçidir.

Valyuta.az xəbər verir ki, o, məsələ ilə bağlı sosial şəbəkədə paylaşım edib.

B.Seyidovun sözlərinə görə, etiketdə 9 manatlıq diş məcununun 4.4 AZN endirimli olduğu göstərilsə də, kassada ondan 9.27 AZN tutulub.

Şikayətçi deyir ki, kassada məsələ barədə bildirdikdən sonra “yanlışlıq olub, məbləğ kartınıza qaytarılacaq” deyilsə də, artıq 14 gün keçməsinə baxmayaraq vəsait geri qaytarılmayıb:

“Mən də "Bravo" marketin əlaqə nömrəsinə yazdım. Onlar məndən noyabr ayı üzrə kart çıxarışı istəyirlər. Kapital Bank isə çıxarışı 20 manata verir.

İndi tərəddüd edirəm: 4.4 manatlıq mal üçün 20 manatlıq çıxarış almaq nə dərəcədə sərfəlidir? Yəni nəticədə mənin nə qədər xeyirim olacaq?”.

Məsələ ilə bağlı "Bravo" marketə sorğu ünvanlamışıq.

©BakuPost