“Tamarind Bio” 13,6 milyon dollar investisiya alıb

ABŞ mərkəzli “Tamarind Bio” 13,6 milyon dollar həcmində A seriyası investisiya cəlb edib. 

Valyuta.az xəbər verir ki, cəlb olunan vəsait molekulyar süni intellekt infrastrukturunun inkişaf etdirilməsi, model kitabxanasının genişləndirilməsi, eləcə də biofarmasevtik şirkətlər üçün korporativ məlumat və süni intellekt inteqrasiyası həllərinin miqyaslandırılması məqsədilə istifadə olunacaq.

2023-cü ildə Şerri Liu və Deniz Kavi tərəfindən təsis edilən “Tamarind Bio” biotexnologiya və əczaçılıq şirkətləri üçün süni intellekt dəstəkli dərman hazırlanması infrastrukturu təqdim edir. Şirkətin platforması alimlərə zülal, anticisim və kiçik molekul dizaynı kimi mürəkkəb prosesləri kompüter mühitində süni intellekt modelləri vasitəsilə daha səmərəli şəkildə həyata keçirməyə imkan yaradır.

Tədqiqatçılar platforma üzərindən həm açıq mənbəli süni intellekt modellərindən, həm də şirkət daxilində mövcud məlumatlar əsasında öyrədilmiş xüsusi modellərdən istifadə edə bilirlər. Bir neçə modeli eyni proses çərçivəsində birləşdirməklə potensial dərman namizədlərini sınaqdan keçirir və nəticələri geniş miqyasda təhlil edirlər.

“Tamarind Bio”nun inkişaf etdirdiyi texnoloji infrastruktur dərman şirkətlərinə laboratoriya mərhələsinə keçməzdən əvvəl kompüter mühitində daha sürətli skrininq aparmağa, namizəd molekulları optimallaşdırmağa və elmi-tədqiqat və təkmilləşdirmə (R&D) proseslərini sürətləndirməyə şərait yaradır.

Mayya Hüseynova