Bit bazarında elektrik alətləri satırdı, indi 15 min istifadəçisi olan startap qurub

"ORA" platforması influenserlərlə iş prosesinin avtomatlaşdırılması məqsədilə yaradılıb.

Valyuta.az xəbər verir ki, startapın təsisçisi Ramil Əhmətdanov (Ramil Axmetdanov) satış və şou-biznes sahəsində çalışarkən yüzlərlə influenser, tapşırıq və ödənişin idarə olunmasının çətinlikləri ilə üzləşib.

Əhmətdanov bildirib ki, startapı yaratmazdan əvvəl uzun illər satış sahəsində fəaliyyət göstərib, bit bazarlarında və müxtəlif şirkətlərdə çalışaraq elektrik alətləri satıb. "Bit bazarında hər bir müştəri uğrunda mübarizə aparmalı, sözün əsl mənasında satışları ‘kemirmək’ lazım gəlir”, - deyə o qeyd edib.

"ORA" ideyası müxtəlif sənətçilər və iri layihələrlə işlədiyi dövrdə yaranıb. Həmin vaxt yüzlərlə mikroinfluenserlə əməkdaşlıq edir, texniki tapşırıqların icrasını və ödəniş proseslərini əl ilə idarə edirdi.

“Bütün prosesi vahid sistemdə idarə etmək çətin idi. Kimin paylaşım etdiyini, tapşırığın yerinə yetirilib-yetirilmədiyini və ödənişlərin statusunu daim izləmək lazım gəlirdi. Məhz bu problem ORA platformasının yaradılmasına səbəb oldu”, - deyə təsisçi bildirib.

Ramil Əhmətdanov həmtəsisçiləri Rifat İqtisamov və Qriqori Kovrijnıx ilə birlikdə ötən ilin noyabrında platformanın hazırlanmasına başlayıb. İlk istifadəçilər şəxsi müraciətlər vasitəsilə cəlb olunub və məhsul qısa müddətdə bazara çıxarılıb.

Hazırda "ORA" platformasında təxminən 15 min istifadəçi qeydiyyatdan keçib. Şirkət iri bizneslər, reklamverənlər və sənətçilərlə əməkdaşlıq edir. Təsisçinin sözlərinə görə, biznes sahibi olan hər kəs platformanın potensial reklamverəni hesab olunur. Hədəf auditoriyasına isə Qazaxıstanda yaşayan 18 yaşdan yuxarı bütün istifadəçilər daxildir.

Tərəfdaşlar arasında Jony, Andro, “ASCAR Cinema” və “Magnum” da yer alır.

Startap hazırda MOST mərkəzinin IRA akselerasiya proqramında iştirak edir. Layihə indiyədək heç bir investisiya cəlb etməyib və şəxsi vəsait hesabına inkişaf etdirilib.

Əhmətdanovun sözlərinə görə, əsas çətinliklər müştərilərin saxlanılması və hüquqi proseslərin düzgün qurulması ilə bağlı olub. O, yeni startapçılara məhsulu uzun müddət təkmilləşdirmək əvəzinə, mümkün qədər tez bazara çıxarmağı və satışa fokuslanmağı tövsiyə edir.

Şirkət artıq Özbəkistan bazarında fəaliyyətə başlayıb. Paralel olaraq Rusiya bazarında da fəaliyyətini genişləndirir.

"ORA"nın əsas hədəfi ilin sonunadək investisiya cəlb etmək, region ölkələrində miqyaslanmaq və gələcəkdə ABŞ bazarına çıxmaqdır. Şirkət eyni zamanda reklam proseslərinin tam avtomatlaşdırılması üzərində işləyir.

Mayya Hüseynova