“Biznesdə yüksək risk – yüksək gəlir” qaydası həmişə işləyirmi?

Biznes dünyasında uğur hekayələri qədər uğursuzluq nümunələri də az deyil. Bəzən cəsarətli addımlar böyük qazanc gətirdiyi halda, eyni yanaşma başqa bir biznes üçün ciddi itkilərlə nəticələnə bilir. Bu isə risk və gəlir arasındakı əlaqənin nə qədər mürəkkəb olduğunu göstərir.

Bəs həqiqətən, biznesdə “Yüksək risk - yüksək gəlir” qaydası həmişə işləyirmi?

Biznes konsultant İlham Əfəndiyev Valyuta.az-a bildirib ki, “Yüksək risk – yüksək gəlir” prinsipi biznesdə hər zaman işləmir:

"Yüksək risk bəzi hallarda yüksək gəlir gətirsə də, eyni zamanda ciddi maliyyə itkilərinə və hətta biznesin fəaliyyətinin zəifləməsinə səbəb ola bilər. Uğurlu bizneslər adətən kor-koranə risk etmirlər. Onlar qərar qəbul etməzdən əvvəl bazarı təhlil edir, riskləri hesablayır, mümkün ssenariləri dəyərləndirir və yarana biləcək itkiləri minimuma endirmək üçün qabaqlayıcı tədbirlər görür və mümkün itkiləri idarə etməyə çalışırlar".

İ.Əfəndiyevin fikrincə, biznesdə əsas məqsəd maksimum risk götürmək deyil, risk və gəlir arasında optimal balansı tapmaqdır:

"Uzunmüddətli perspektivdə ən uğurlu şirkətlər daha çox risk edənlər deyil, riskləri düzgün qiymətləndirən və effektiv idarə edənlər olur. Bu yanaşma həm biznesin davamlı inkişafına, həm də maliyyə dayanıqlığının qorunmasına imkan yaradır".

Tənzilə Ağabalayeva