Mərkəzi Bank rəsmisi: "Ölkədaxili dələduzluq əməliyyatlarında məbləğ, ölkəxarici əməliyyatlarda isə say üstünlük təşkil edir" 

Rəqəmsallaşmanın genişlənməsi və banklarla ödəniş təşkilatlarının biznes portfellərinin böyüməsi fonunda banklarla bağlı fırıldaqçılıq halları da artmaqdadır.

Valyuta.az xəbər verir ki, bunu Azərbaycan Respublikası Mərkəzi Bankının Ödəniş Sistemləri və Məhsulların İnkişafı Departamentinin aparıcı mütəxəssisi Elvin Cəfərov "X Beynəlxalq Maliyyə və Bankçılıq Sammiti"ndə çıxışı zamanı deyib.

Elvin Cəfərov qeyd edib ki, ötən ilin ilk iki rübündə müəyyən sabit azalma müşahidə olunsa da, ikinci rübdən etibarən ölkədaxili fırıldaqçılıq əməliyyatlarında kəskin artım qeydə alınıb:

"Ölkəxarici dələduzluq əməliyyatlarında məbləğ az, əməliyyatların sayı isə nisbətən çox olur. Bu kateqoriyaya əsasən kartın fiziki iştirakı olmadan həyata keçirilən elektron ticarət əməliyyatları daxildir. Əməliyyatların xarakteristikası onu göstərir ki, say baxımından çox olsa da, məbləğ baxımından nisbətən aşağı göstəricilər qeydə alınır", – deyə o vurğulayıb.

Mərkəzi Bank rəsmisi bildirib ki, ölkədaxili dələduzluq hallarında əsas istiqaməti sosial mühəndislik və ödəniş alətlərindən istifadə edən şəxslərin manipulyasiyası təşkil edir:

"Bu zaman həm hesabların ələ keçirilməsi, həm də vətəndaşların aldadılaraq əməliyyatları özlərinin həyata keçirməsi nəticəsində daha böyük məbləğlər itirilir".

O əlavə edib ki, 2026-cı ilin birinci rübündə ötən ilin dördüncü rübü ilə müqayisədə müəyyən azalma müşahidə olunub. Bunun konkret səbəbini müəyyənləşdirməyin çətin olduğunu bildirən mütəxəssis, azalmada bəzi iri bankların antifrod sistemlərini təkmilləşdirməsinin rol oynamasının mümkün olduğunu qeyd edib.

Əməliyyatların sayı üzrə tendensiyalara toxunan E.Cəfərov bildirib ki, ölkədaxili banklarla bağlı fırıldaqçılıq əməliyyatlarda say nisbətən az, məbləğ isə yüksək olur:

"Ölkədaxili dələduzluq əməliyyatlarının sayında ötən ilin ikinci rübündən etibarən əhəmiyyətli artım müşahidə edilib. Ölkəxarici dələduzluq əməliyyatlarında isə artım və azalmaların növbələşdiyini deyən Mərkəzi Bank rəsmisi bunun səbəbləri arasında kütləvi kiberhücumlar və fişinq saytlarının çoxalmasının da ola biləcəyini vurğulayıb. Fişinq saytlarının əksəriyyətinin domen və ekvayer tərəflərinin xaricdə yerləşməsi bu əməliyyatların daha çox ölkəxarici dələduzluq kateqoriyasına daxil edilməsinə səbəb olur".

Mayya Hüseynova