Tamerlan Rüstəmov: "Ani ödənişlərdə fırıldaqçılıq risklərinin artması gözləniləndir"

Bakıda keçirilən "X Beynəlxalq Maliyyə və Bankçılıq Sammiti"ndə rəqəmsal ödənişlərdə fırıldaqçılıq riskləri müzakirə olunub.

Valyuta.az xəbər verir ki, "Azərbaycan Banklar Assosiasiyası" (ABA) İctimai Birliyinin nəzdində fəaliyyət göstərən Ödəniş sistemləri və rəqəmsal bankçılıq üzrə ekspert qrupunun rəhbəri Tamerlan Rüstəmov bildirib ki, əməliyyat dövriyyəsinin artdığı ödəniş sistemlərində fırıldaqçılıq hallarının da paralel şəkildə yüksəlməsi qaçılmazdır.

T.Rüstəmov qeyd edib ki, bu tendensiya xüsusilə ani ödəniş sistemlərində müşahidə olunur və beynəlxalq təcrübə də bunu təsdiqləyir.

"Əməliyyat dövriyyəsi hansı ödəniş sistemindən keçirsə, dövriyyə artdıqca fırıldaqçılıq halları da yüksələcək. Bu, bazarın təbii inkişaf mərhələsidir", – deyə o vurğulayıb.

Onun sözlərinə görə, risklərin azaldılması üçün beynəlxalq təcrübədə "cooling period" (soyutma dövrü) kimi mexanizmlər tətbiq edilir. Bu yanaşma vəsaitin qarşı tərəfin hesabına dərhal köçürülməməsini və müəyyən yoxlama müddətindən sonra əlçatan olmasını nəzərdə tutur.

T.Rüstəmov əlavə edib ki, rəqəmsal ödəniş ekosisteminin təhlükəsiz inkişafı üçün risk idarəetmə çərçivələrinin təkmilləşdirilməsi və qabaqlayıcı tədbirlərin gücləndirilməsi vacibdir.

Mayya Hüseynova