"BYD" rəhbəri: Şirkət 5 il ərzində dünyanın ən böyük avtomobil istehsalçısına çevriləcək

Çinin aparıcı elektromobil istehsalçılarından olan "BYD" şirkətinin idarə heyətinin sədri Vanq Çuanfu bildirib ki, şirkət qarşıdakı beş il ərzində dünyanın ən böyük avtomobil istehsalçısı olmağı hədəfləyir.

Valyuta.az bildirib ki, Vanq Çuanfu bu açıqlamanı Şençjendə keçirilən illik səhmdar yığıncağında edib. O, son bir ildə şirkətin səhmlərində müşahidə olunan ciddi ucuzlaşmadan sonra investorları sakitləşdirməyə çalışıb.

2025-ci ildə 4,6 milyon avtomobil satışı ilə qlobal reytinqdə altıncı yeri tutan "BYD" son aylarda daxili bazarda artım tempini bərpa etməkdə çətinlik çəkir. Şirkət yerli rəqiblərlə güclənən rəqabət səbəbindən satış təzyiqi ilə üzləşib.

Son bir il ərzində "BYD"nin Honq Konq birjasında ticarət olunan səhmləri pik göstəricidən 45 faizdən çox, Şençjen birjasındakı səhmləri isə 33 faiz ucuzlaşıb.

İxrac və texnologiyalar əsas ümid mənbəyidir

Təxminən min səhmdarın iştirak etdiyi toplantıda Vanq Çuanfu bildirib ki, şirkətin bu il qarşılaşdığı əsas inkişaf məhdudiyyəti ikinci nəsil "Blade Battery" batareyalarının istehsal gücünün artırılmasıdır. Onun sözlərinə görə, "BYD"nin güclü ixrac göstəriciləri və batareya texnologiyaları, eləcə də sürətli enerji doldurma sahəsindəki yenilikləri gələcək inkişafın əsas hərəkətverici qüvvəsi olacaq.

"BYD" beş il ərzində həqiqətən də istehsal həcminə görə dünyanın bir nömrəli avtomobil istehsalçısına çevriləcək", – deyə Vanq Çuanfu bildirib.

"Toyota"nı geridə qoymaq hədəfi

Bu məqsədə çatmaq üçün "BYD" hazırda qlobal lider olan "Toyota Motor"u geridə qoymalıdır. Yapon şirkəti 2025-ci ildə "BYD"dən iki dəfədən çox avtomobil satıb. Bununla belə, son illərdə "Toyota"nın Cənub-Şərqi Asiya və Yaxın Şərq kimi bazarlardakı payı azalır.

Həmin regionlarda Çin avtomobil istehsalçıları, xüsusilə də "BYD", sürətli böyümə nümayiş etdirirlər. Şirkətin ixracı 2026-cı ilin yanvar-may aylarında illik müqayisədə 65 faiz artıb.

"BYD"nin ən böyük xarici bazarları Braziliya, Böyük Britaniya və Avstraliya olub. Bu artıma nisbətən aşağı ticarət maneələri dəstək verib.

Daxili bazardakı zəiflik davam edir

Bununla yanaşı, ixracdakı yüksəliş daxili bazardakı zəifləməni tam kompensasiya edə bilməyib. Şirkətin ümumi avtomobil tədarükləri ilin ilk beş ayında 20 faizdən çox azalıb.

Çuanfunun açıqlamalarına baxmayaraq, investorların reaksiyası ehtiyatlı olub. İyunun 10-da səhər saatlarında "BYD"nin Honq Konq birjasındakı səhmləri 4,3 faiz, Şençjen birjasındakı səhmləri isə 1,6 faiz ucuzlaşıb.

Tənzilə Ağabalayeva