"Apple" abunəlik sistemini kökündən dəyişir

“Apple” “iPhone” tətbiqləri üçün paket abunəlik modelini tətbiq etməyə hazırlaşır. Yeni sistem sayəsində fərqli şirkətlər tərəfindən hazırlanan tətbiqlər vahid paket halında, daha sərfəli qiymətə istifadəçilərə təqdim ediləcək.

Valyuta.az xəbər verir ki, bu yenilik ənənəvi video və musiqi platformalarının paketləşmə modelinə bənzəsə də, bu dəfə daha geniş ekosistemi əhatə edən müstəqil tətbiqlərin bir araya gətirilməsi nəzərdə tutulur. Məsələn, gələcəkdə “Instagram Plus” və “Tinder Platinum” kimi xidmətlərin eyni abunəlik paketi daxilində təqdim olunması mümkün ola bilər.

Şirkət yeni model çərçivəsində “Suites” (paketlər) adlı əlavə bir konsepti də təqdim edir. Bu sistem sayəsində tərtibatçılar ayrı-ayrılıqda satmadıqları bəzi premium funksiyaları yalnız paket daxilində birləşdirərək istifadəçilərə təqdim edə biləcəklər. Beləliklə, yalnız həmin paketə məxsus xüsusi məzmun və funksiyalara tək abunəliklə çıxış mümkün olacaq.

“Apple” bu yenilikləri son tərtibatçı konfransında elan edib. Şirkət yalnız paket modelinə fokuslanmır, eyni zamanda “App Store” qaydalarını da sərtləşdirir. Artıq uzun müddətdir yenilənməyən, az yüklənən və yalnız kommersiya məqsədi ilə yayımlanan tətbiqlər platformadan çıxarılacaq.

Bundan əlavə, “Mac” kompüterlər üçün tətbiq hazırlayan tərtibatçıların köhnə Intel əsaslı modellərə dəstək vermə öhdəliyi ləğv olunur. Uşaqların təhlükəsizliyi ilə bağlı yeni qaydaya əsasən isə tərtibatçılar tətbiqlərində sosial media funksiyalarının olub-olmadığını açıq şəkildə qeyd etməli olacaqlar. Bu dəyişiklik yaş məhdudiyyətlərinin və ekran vaxtı nəzarətinin daha dəqiq işləməsinə imkan verəcək.

“Apple” yeni abunəlik paketləri və “Suites” sistemi ilə bağlı ətraflı məlumatı yayın sonuna doğru açıqlayacağını bildirir. Bu yeniliklərin “iOS 27” əməliyyat sisteminin payız təqdimatı ilə üst-üstə düşəcəyi gözlənilir.

Paşa Məmmədli