Məşhur bankadan qızıl üçün bədbin proqnoz: Kəskin eniş siqnalları güclənir

Yaxın Şərqdə gərginliyin artması və ABŞ Federal Ehtiyat Sisteminin (FED) faiz artımı gözləntiləri fonunda qızıl qiymətləri 11 həftənin ən aşağı səviyyəsinə enib. 

Valyuta.az xəbər verir ki, texniki baxımdan 200 günlük hərəkətli orta göstəricinin altına düşən qiymətli metal üçün “Standard Chartered” bankı ciddi xəbərdarlıq edib. Bankın açıqlamasına görə, qızılla bağlı dəstəkli investisiya məhsullarında mövqelər zərərə keçərsə, aşağı yönlü risklər daha da arta bilər.

Qızıl qiymətləri ABŞ hərbi helikopterinin vurulması ilə bağlı İranla gərginliyin artmasından sonra enişini davam etdirib.

Spot qızıl erkən saatlarda 4173,15 dollara qədər geriləyib və hazırda əvvəlki günlə müqayisədə 2,03% azalaraq unsiya üzrə 4174 dollar səviyyəsində ticarət olunur. 

ABŞ qüvvələrinin İrana qarşı hücumları münaqişənin sona çatdırılması səylərini risk altına ataraq kövrək atəşkəsi də təhdid edir. Son toqquşmalar qlobal enerji daşımaları üçün strateji əhəmiyyət daşıyan Hörmüz boğazında nəqliyyatın ciddi şəkildə pozula biləcəyi riskini artırıb.

Dolların möhkəmlənməsi dollarla qiymətləndirilən qızılı digər valyutalardan istifadə edən investorlar üçün daha bahalı edir. Neft qiymətlərində artım isə inflyasiya narahatlıqlarını gücləndirərək faizlərin daha uzun müddət yüksək qalacağı gözləntilərini artırır.

“Tastylive” qlobal makro rəhbəri İlya Spivak bildirib ki, qızıl üzərində təzyiqin əsas səbəbi FED-in siyasət gözləntilərində dəyişiklik, istiqraz gəlirlərinin artması və dolların güclənməsidir.

Bazarlar “CME FedWatch” alətinə əsasən FED-in dekabr ayına qədər faiz artırma ehtimalını 70%-dən yüksək qiymətləndirir. Qızıl inflyasiyaya qarşı qorunma vasitəsi sayılsa da, yüksək faiz dərəcələri gəlir gətirməyən bu aktivə təzyiq göstərir.

İnvestorlar FED-in pul siyasəti ilə bağlı siqnallar üçün bu həftə açıqlanacaq ABŞ inflyasiya göstəricilərinə diqqət yetirirlər. May ayı İstehlak Qiymətləri İndeksi çərşənbə günü, İstehsalçı Qiymətləri İndeksi isə cümə axşamı dərc olunacaq.

Texniki görünüşə görə spot qızılda enişin 4107 dollara qədər davam edə biləcəyi bildirilir. 4199 dollar səviyyəsi müqavimət kimi izlənilir, bu həddin aşılması halında 4228–4246 dollar aralığı gündəmə gələ bilər. Aşağı istiqamətli hərəkətin davamında 4079–4107 dollar aralığı əsas dəstək zonası kimi göstərilir.

Qızılın qiyməti fevralın sonundan əvvəlki münaqişə dövrü ilə müqayisədə xeyli aşağı səviyyədə ticarət olunur. 200 günlük orta göstəricinin altına eniş institusional investorların izlədiyi mühüm texniki siqnal kimi əlavə satış təzyiqi yaradıb.

“Standard Chartered” Qlobal Əmtəə Araşdırmaları rəhbəri Suki Kuper bildirib ki, faiz artımı ehtimalının yüksəlməsi qısamüddətli qiymət dəyişkənliyini artırır. Onun sözlərinə görə, qızılla bağlı ETF əsaslı məhsullarda mövqelər zərərə düşərsə, qiymətlər əlavə eniş riski ilə üzləşə bilər.

Kuper həmçinin qeyd edib ki, qızıl üçün növbəti texniki dəstək səviyyəsi təxminən 4100 dollar hesab olunur. Hindistan bazarlarında tələb zəif qalır, Çin isə unsiya üzrə 10 dollardan aşağı sabit yerli premiumla nisbətən müsbət ayrışır.

Paşa Məmmədli