“Aqrarkredit”in balansındakı 4 milyonluq obyekt hərraca çıxarılır

“Aqrarkredit” Qapalı Səhmdar Cəmiyyəti Bank olmayan Kredit Təşkilatının balansında olan bir sıra daşınmaz əmlaklar yenidən hərraca çıxarılır.

Valyuta.az xəbər verir ki, sözügedən əmlaklar artıq üçüncü dəfə satışa təqdim olunur və bu dəfə onların başlanğıc qiyməti 30% aşağı salınıb.

Hərrac 24 iyun 2026-cı il tarixində saat 11:30-da Əmlak Xidmətləri Məkanında (Bakı şəhəri, Nizami rayonu, Xəlil Rza Ulutürk küçəsi, 20) keçiriləcək.

Satışa çıxarılan əmlaklar əsasən Bakının Nərimanov, Səbail, Yasamal və Xətai rayonlarında yerləşən qeyri-yaşayış sahələrindən ibarətdir.

Ən yüksək başlanğıc qiyməti Bakı şəhəri Nərimanov rayonu, Məmməd Araz küçəsi 95 ünvanında yerləşən 1 078,10 kvadratmetr sahəyə malik qeyri-yaşayış binasına məxsusdur. Obyekt 4 milyon 60 min manat başlanğıc qiymətlə satışa çıxarılır. Hərracda iştirak üçün tələb olunan beh məbləği isə 20 300 manatdır.

Səbail rayonu, Zərifə Əliyeva küçəsi 3 ünvanında yerləşən 412,8 kvadratmetrlik qeyri-yaşayış sahəsi 1 milyon 690 min 500 manat başlanğıc qiymətlə təklif olunur.

Yasamal rayonu, Əsəd Əhmədov küçəsində yerləşən iki qeyri-yaşayış sahəsi də hərraca çıxarılıb. Yeni Yasamal yaşayış massivində yerləşən və -2 səviyyədə olan 5 948,3 kvadratmetrlik sahənin başlanğıc qiyməti 770 min manat, -1 səviyyədə yerləşən 5 151,7 kvadratmetrlik sahənin qiyməti isə 828 min 100 manat müəyyən edilib.

Bundan başqa, Xətai rayonu, Cingizxan Kərimov küçəsində yerləşən 1 025,5 kvadratmetrlik qeyri-yaşayış sahəsi 358 min 400 manat başlanğıc qiymətlə satışa çıxarılır.

Sərvanə Rəmixanova