Azərbaycanda şadlıq sarayı açmaq neçəyə başa gəlir?

Azərbaycanda kifayət qədər yayılmış biznes sahələrindən biri də şadlıq saraylarıdır. Toy, nişan, ad günü və digər mərasimlərə olan tələbat bu sahəyə marağın yüksək qalmasına səbəb olub. Lakin şadlıq sarayı biznesi yalnız görünən gəlirdən ibarət deyil və ciddi planlama tələb edir. Bəs, bir şadlıq sarayının açılması sahibkara təxminən neçəyə başa gəlir?

Valyuta.az-a danışan restorator Mahir Əhmədzadə bildirir ki, şadlıq sarayı açarkən nəzərə alınmalı məqamlar kifayət qədər çoxdur.

Onun sözlərinə görə, ən vacib məsələlərdən biri məkanın düzgün seçilməsidir: "Giriş-çıxış yollarının rahat olması, parklanma imkanları, yaşayış binalarından müəyyən məsafədə yerləşməsi və səs-küy amilinin nəzərə alınması xüsusi əhəmiyyət daşıyır. Bundan əlavə, rayon və şəhərətrafı ərazilərdə icarə xərcləri arasında ciddi fərqlər mövcuddur və bu amil mütləq nəzərə alınmalıdır".

Ekspert vurğulayır ki, düzgün yer seçimi uğurun yarısı deməkdir: "Orta ölçülü şadlıq sarayları adətən 250-400 nəfərlik tutuma malik olur. Bu formatda bir böyük zal və ya iki mərtəbəli planlama, ayrıca mətbəx və personal zonası nəzərdə tutulur. Çox böyük tutum xərcləri artırdığı kimi, çox kiçik tutum da gəlirliliyi məhdudlaşdırır. Bütün bu amillər nəzərə alındıqda, orta ölçülü şadlıq sarayını tikilib tam formada açılması üçün tələb olunan ilkin investisiya bəzi hallarda 700 min manatdan 2 milyon manata qədər dəyişə bilər. Ümumilikdə isə bazarda elə şadlıq sarayları mövcuddur ki, onların dəyəri 5 milyon manatdan başlayaraq 40 milyon manata qədər yüksəlir".

Mahir Əhmədzadə qeyd edir ki, 15-20 il əvvəl şadlıq sarayları əsasən daş və beton konstruksiyalarla, daha ağır və abartılı tikinti üslubunda inşa olunurdu: "Hazırda isə bu sahədə modernləşmə müşahidə olunur. Şadlıq sarayları artıq dəmir konstruksiyalar üzərində, daha sadə və müasir üslubda tikilir, interyer dizaynı da bu yanaşmaya uyğun formalaşdırılır. Bu isə müəyyən hallarda tikinti xərclərinin nisbətən daha münasib olmasına şərait yaradır. Buna baxmayaraq, bu gün də şadlıq sarayı açmaq üçün tələb olunan məbləğlər təxminən 1-5 milyon manat aralığında dəyişir".

Ekspertin fikrincə, hazırkı dövrdə şadlıq sarayı biznesinə başlamaq risklidir. O bildirir ki, pandemiya dövrü insanların toy və mərasimlərə yanaşmasını dəyişib. Artıq az sayda qonaqla, bağlarda və ya restoranlarda toy etmək daha geniş yayılıb. Bu da şadlıq saraylarında keçirilən toyların sayının azalmasına səbəb olub.

“Bugünkü reallıq ondan ibarətdir ki, şadlıq saraylarında toyların sayı xeyli azalıb. Şəxsi mövqeyim ondan ibarətdir ki, bu qədər böyük məbləğ olsa belə, mən bu sahəyə investisiya etməzdim. Əvəzində istehsal yönümlü bir sahəyə yatırımın daha uğurlu olacağını düşünürəm”, - deyə Mahir Əhmədzadə vurğulayıb.

O, həmçinin əlavə edib ki, bu biznes üçün ilkin investisiya ilə yanaşı, işçilərin maaşları, mətbəx avadanlıqları, texniki xidmət və digər əməliyyat xərcləri də mütləq nəzərə alınmalıdır.

Sərvanə Rəmixanova