Avropada qazın qiyməti dörd aylıq maksimuma yüksəldi

Yaxın Şərq regionunda toqquşmaların şiddətlənməsi səbəbindən Avropada təbii qazın dəyəri son dörd ay ərzində qeydə alınan ən yüksək göstəriciyə çatıb.

Oxu.Az-ın "Politico" nəşrinə istinadən verdiyi məlumata görə, iyulun 20-də təbii qazın qiyməti meqavat-saat üçün 60 avro həddini keçib. Bu, mart ayının ortalarından etibarən qeydə alınan ilk belə haldır. Bu gün isə bu göstərici 59 avroya bərabər olub.

Artım ABŞ-nin İrana ardıcıl onuncu gecə zərbələr seriyası endirməsindən və Tehranın buna cavab olaraq Fars körfəzində tankerlərə hücum etməsindən sonra başlayıb. Analitiklər xəbərdarlıq edirlər ki, Yaxın Şərq böhranı müvəqqəti amil olmaqdan çıxıb və struktur reallığa çevrilir.

"Hörmüz boğazı artıq mayeləşdirilmiş təbii qaz üçün etibarlı yol hesab edilmir", - deyə "Montel Energy" analitiki Tobias Federiko bildirib.