"Together AI"ın dəyəri 8,3 milyarda yüksəldi

Süni intellekt sahəsində açıq mənbəli böyük dil modelləri üçün bulud infrastrukturu təqdim edən "Together AI" 800 milyon dollar həcmində Seriya C investisiya raundunu uğurla başa vurub.

Valyuta.az xəbər verir ki, yeni maliyyələşmə nəticəsində şirkətin bazar dəyəri 8,3 milyard dollara çatıb.

İnvestisiya raunduna "Aramco Ventures" rəhbərlik edib. Raundda həmçinin "Vista Equity Partners", "General Catalyst", "NVIDIA", "Emergence Capital", "March Capital", "Prosperity7 Ventures", "Salesforce Ventures", "Coatue" və şirkətin digər mövcud investorları iştirak ediblər.

2022-ci ildə təsis olunan "Together AI" tərtibatçılar və korporativ müştərilər üçün açıq mənbəli böyük dil modellərinin öyrədilməsi, incə tənzimlənməsi (fine-tuning) və istehsal mühitində istifadəsini təmin edən bulud infrastrukturu təqdim edir. Platforma əsasən "DeepSeek", "MiniMax", kimi və digər açıq mənbəli modellərin yüksək məhsuldarlıqlı GPU klasterləri üzərində işlədilməsinə fokuslanır.

Şirkət yeni cəlb etdiyi vəsaiti GPU infrastrukturunun genişləndirilməsinə, qlobal məlumat mərkəzlərinin gücünün artırılmasına və korporativ müştərilər üçün süni intellekt platformasının inkişafına yönəltməyi planlaşdırır. 

Şirkətin açıqladığı məlumata görə, "Together AI"ın illik sifariş həcmi son rübün yekunlarına əsasən 1,15 milyard dolları ötüb. Platformanın minlərlə ödənişli müştərisi var. 

Qeyd edək ki, bu investisiya süni intellekt infrastrukturu təqdim edən "neocloud" şirkətlərinə investor marağının davam etdiyi bir dövrə təsadüf edir. Hesablama resurslarına artan tələbat və açıq mənbəli süni intellekt modellərinin geniş yayılması "Together AI" kimi alternativ bulud xidməti təminatçılarını texnologiya sektorunun ən sürətlə inkişaf edən istiqamətlərindən birinə çevirir.

Sərvanə Rəmixanova