Startaplar üçün ən effektiv marketinq strategiyası hansıdır? - Marketoloq

Son illər startapların sayı artsa da, onların bazarda tanınması, hədəf auditoriyasına çatması və müştəri qazanması əsas çağırışlardan biri olaraq qalır. Xüsusilə məhdud büdcə ilə fəaliyyət göstərən startaplar üçün düzgün marketinq strategiyasının seçilməsi böyük əhəmiyyət daşıyır.

Bəs bu halda startaplar üçün ən effektiv marketinq strategiyası hansıdır?

Marketoloq Samir Mehdiyev Valyuta.az-a bildirib ki, startaplar üçün vahid və universal marketinq strategiyası yoxdur. Çünki hər bir layihənin büdcəsi, hədəf auditoriyası və məhsulu fərqlidir:

"Startapların ən böyük səhvi böyük brendlər kimi davranmağa çalışmaları və büdcələrini ilk aylardan kütləvi reklamlara xərcləmələridir. Məncə, startap marketinqinin əsas prinsipi çevik (Lean) və data yönümlü yanaşma olmalıdır. Uğurlu başlanğıc üçün qeyd etdiyim addımlar effektiv nəticələr verir".

Samir Mehdiyev bildirib ki, uğurlu startap marketinqi üçün ilk növbədə “məhsul–bazar uyğunluğunu (Product-Market Fit) təmin etmək” lazımdır:

"Marketinqə vəsait ayırmazdan əvvəl məhsulun bazarda həqiqətən tələbat yaratdığına əmin olmaq vacibdir. Bunun üçün əvvəlcə hədəf müştərinin problemi müəyyənləşdirilməli, daha sonra həmin problemə uyğun həll hazırlanmalıdır".

Ekspert qeyd edir ki, növbəti mərhələdə “minimum həyat qabiliyyətli məhsulla (MVP – Minimum Viable Product) bazarı test etmək” lazımdır. İlk istifadəçilərin rəyləri (feedback) əsasında məhsul davamlı şəkildə təkmilləşdirilməlidir. Onun fikrincə, məhsul real problemi həll etmirsə, heç bir marketinq strategiyası uğur gətirməyəcək.

"Startaplar üçün “mikro və nano-influenserlərlə əməkdaşlığa üstünlük vermək” daha məqsədəuyğundur. Böyük blogerlərə yüksək büdcə ayırmaq əksər hallarda səmərəli olmur. Əvəzində, fəaliyyət sahəsi ilə birbaşa əlaqəli, 2 000–10 000 izləyicisi olan influenserlərlə əməkdaşlıq daha yüksək nəticə verə bilər. İlkin mərhələdə barter modeli, məhsul və ya xidmətdən pulsuz istifadə imkanı, yaxud ortaq komissiya (affiliate) sistemi də tətbiq oluna bilər"- deyə S.Mehdiyev bildirib.

Ekspertin fikrincə , startaplar “Growth Hacking və partizan marketinqindən istifadə etməyə” də üstünlük verməlidirlər:

"Məhdud resurslar şəraitində yaradıcı və aşağı büdcəli həllər daha effektiv nəticə verir. Bu baxımdan, istifadəçilərin dostlarını dəvət etməsi qarşılığında hər iki tərəfin fayda əldə etdiyi mexanizmlərin qurulması, eləcə də sosial mediada gündəmdə olan mövzulardan (real-time marketing) yaradıcı şəkildə istifadə edilməsi minimum büdcə ilə maksimum diqqət cəlb etməyə imkan yaradır".

Tənzilə Ağabalayeva