"MGX" şirkəti tarixdə ən böyük süni intellekt fondlarından biri üçün 49 milyard dollar cəlb edib

BƏƏ-nin Abu-Dabi şəhərində yerləşən "MGX" şirkəti süni intellekt sahəsində investisiyalara yönəlmiş tarixdə ən böyük fondlardan biri üçün 49 milyard ABŞ dolları vəsait cəlb edib. Bu nəticə cəmi iki il əvvəl yaradılmış şirkəti qlobal miqyasda süni intellekt sektorunun ən nüfuzlu investorları sırasına yüksəldib.

Valyuta.az "Bloomberg"ə istinadən xəbər verir ki, şirkət Yaxın Şərq, Şimali Amerika, Asiya və Avropadan olan iri institusional və özəl investorların iştirakını təmin edib.

Şirkətin yaydığı açıqlamada bildirilib ki, cəlb olunan vəsait əvvəlcədən müəyyən edilmiş 45 milyard dollarlıq hədəfi üstələyərək 49 milyard dollara çatıb.

Son həftələrdə bağlanan yeni fonddan artıq investisiyalar həyata keçirilməyə başlanılıb. Bu addım Abu-Dabinin böyük neft gəlirlərini qlobal iqtisadiyyatı dəyişdirəcəyi gözlənilən texnologiyalar üzərində uzunmüddətli təsirə çevirmək strategiyasını nümayiş etdirir.

Abu-Dabi qısa müddətdə süni intellekt sahəsində maliyyələşdirmənin aparıcı mərkəzlərindən birinə çevrilir və bu prosesdə "MGX" əsas rol oynayır. Şirkət Abu-Dabinin maliyyə imkanlarından və aparıcı texnologiya şirkətləri ilə tərəfdaşlıqlarından istifadə edərək sənayenin strateji aktivlərinə sərmayə yatırır.

Şeyx Təhnun bin Zayed Əl Nəhyanın rəhbərlik etdiyi və "Mubadala Investment Co." ilə "G42" tərəfindən dəstəklənən "MGX" qabaqcıl süni intellekt modelləri, yarımkeçirici infrastrukturu və məlumat emalı mərkəzlərini əhatə edən geniş investisiya portfeli formalaşdırıb.

Şirkət "OpenAI" və "xAI" şirkətlərinə sərmayə yatırıb, eyni zamanda "BlackRock Inc." və "Microsoft Corp." ilə birlikdə qlobal layihələrdə iştirak edir.

Yeni investisiyalar şirkətin artıq yatırdığı milyardlarla dollarlıq vəsaitə əlavə olunacaq.

"MGX" idarəetməsində olan aktivlərin həcmini 100 milyard dollardan yuxarı səviyyəyə çatdırmağı hədəfləyir. Bu məqsədə nail olmaq üçün şirkət qarşıdakı bir neçə il ərzində hər il 10 milyard dollara qədər investisiya qoymağı planlaşdırır.

Yeni vəsait cəlbi süni intellekt aktivləri uğrunda rəqabətin gücləndiyi dövrə təsadüf edir. Hökumətlər, suveren sərvət fondları və özəl investisiya şirkətləri gələcək onilliklərin əsas texnologiyası hesab olunan süni intellekt sahəsində mövqelərini möhkəmləndirməyə çalışırlar.

Abu-Dabi isə böyük maliyyə resursları, ucuz enerji imkanları və qlobal texnologiya liderləri ilə sıx əlaqələri sayəsində bu ekosistemin mərkəzində mövqe tutub.

Bununla yanaşı, son günlər texnologiya sektorunda yüksəliş tempi zəifləyib. İnvestorlar xüsusilə süni intellektə yüz milyardlarla dollar sərmayə yatıran şirkətlərin səhmlərinin həddindən artıq bahalaşmasından narahatlıq keçirirlər.

"MGX" üçün üçüncü tərəf investorlarından kapital cəlb edilməsi şirkəti əsasən dövlət vəsaitlərini idarə edən ənənəvi Körfəz suveren sərvət fondlarından fərqləndirir.

Şirkət yarandığı gündən etibarən institusional kapital cəlb edən və Abu-Dabidəki tərəfdaşları ilə birgə investisiya qoyan qlobal alternativ aktiv idarəedicisi modeli əsasında fəaliyyət göstərmək üçün yaradılıb.

Bu model "MGX"ə daha iri həcmli əməliyyatlar həyata keçirməyə, investor bazasını genişləndirməyə və uzunmüddətli strateji hədəflərinə daha sürətlə yaxınlaşmağa imkan verir.

Cəlb edilən yeni vəsait qabaqcıl süni intellekt sistemlərinin hazırlanmasının getdikcə bahalaşdığı bir dövrdə "MGX"in investisiya imkanlarını daha da artıracaq.

Süni intellekt modellərinin öyrədilməsi, eləcə də onları dəstəkləyən məlumat emalı mərkəzlərinin və yarımkeçirici infrastrukturunun qurulması artıq on milyardlarla dollar həcmində sərmayə tələb edir.

Bu isə investorları getdikcə daha iri kapital fondları formalaşdırmağa sövq edir.

Tənzilə Ağabalayeva