ABŞ "Anthropic"in "Fable" və "Mythos" modellərinə tətbiq etdiyi məhdudiyyətləri ləğv edib

ABŞ Ticarət Nazirliyi Anthropic şirkətinin ən qabaqcıl "Fable 5" və "Mythos 5" süni intellekt modellərinə tətbiq olunan ixrac məhdudiyyətlərini ləğv edib.

Valyuta.az xəbər verir ki, qərar, təhlükəsizlik riskləri səbəbindən modellərin istifadəsinin müvəqqəti dayandırılmasından üç həftə keçməmiş qəbul olunub.

İyunun 12-də verilən göstərişə əsasən, şirkətdən xarici vətəndaşların modellərə çıxışını məhdudlaşdırması tələb edilib. İstifadəçilərin vətəndaşlığını real vaxtda təsdiqləmək mümkün olmadığından, "Fable 5" və "Mythos 5" bütün istifadəçilər üçün deaktiv edilib.

Əlavə təhlükəsizlik mexanizmləri tətbiq edildikdən sonra hökumət bütün ixrac məhdudiyyətlərini aradan qaldırıb. Şirkət artıq "Fable 5" modelini geniş istifadəçi auditoriyasına təqdim edir, "Mythos 5" isə mərhələli şəkildə yerli və beynəlxalq etibarlı tərəfdaşlara açılacaq.

Şirkət həmçinin Amazon, Microsoft və Google ilə birlikdə süni intellekt modellərində təhlükəsizlik mexanizmlərinin aşılması hallarına qarşı vahid sənaye standartlarının hazırlanması üzərində işlədiyini açıqlayıb.

ABŞ Ticarət Naziri Howard Lutnick şirkətin gələcək modellərlə bağlı təhlükəsizlik protokollarının hazırlanması və zərərli fəaliyyətlərin hökumətə bildirilməsi istiqamətində əməkdaşlıq etməyə razılaşdığını bildirib. Nazirlik vurğulayıb ki, öhdəliklər yerinə yetirilməzsə, məhdudiyyətlər yenidən tətbiq oluna bilər.

Həmçinin OpenAI də oxşar məhdudiyyətlərlə üzləşib. Şirkət ABŞ hökumətinin tələbi ilə "GPT-5.6" modelinin tam ictimai istifadəyə verilməsini təxirə saldığını və modelə çıxışın hələlik yalnız yoxlanılmış tərəfdaşlarla məhdudlaşdırıldığını açıqlayıb.

Rəfiqə Abdin