Qadınların danışıq bacarıqları biznesdə üstünlük yaradır - ARAŞDIRMA

İş dünyasında mehriban və səmimi olmağın maliyyə itkisinə səbəb olduğu ilə bağlı uzun illər mövcud olan təsəvvür tədricən aktuallığını itirir. Yeni araşdırmalar göstərir ki, qadınlar danışıqlar zamanı daha yaxşı dinləmə və etimad yaratmaq bacarıqları sayəsində qarşı tərəfdə daha yüksək məmnunluq yaradır, eyni zamanda gələcək əməkdaşlıqlar üçün daha əlverişli zəmin formalaşdırırlar.

Valyuta.az xəbər verir ki, danışıqlar masasında uğuru müəyyən edən amillər yalnız maliyyə göstəriciləri deyil, həm də tərəflər arasında qurulan ünsiyyətin keyfiyyətidir. Uzun illər qadınların danışıqlarda daha passiv olduğu və sərt mövqe nümayiş etdirmədiyi barədə formalaşmış təsəvvürlər isə tədricən qüvvəsini itirir. "Cornell University"nin tədqiqatçıları müəyyən ediblər ki, emosional intellekt və etimad amilləri ön plana çıxdıqda danışıqlar masasındakı balans dəyişir.

Səmimiyyət maliyyə nəticələrinə mənfi təsir göstərmir

İş dünyasında uzun müddət səmimi davranışın maliyyə baxımından itkilərə səbəb olduğu düşünülürdü. Lakin son simulyasiya nəticələri bu fikrin həqiqəti əks etdirmədiyini göstərib. Araşdırma çərçivəsində təhlil edilən minlərlə nümunə göstərib ki, qadınlar maliyyə nəticələrinə görə kişilərlə eyni səviyyədə uğur qazanmaqla yanaşı, danışıqlar prosesinin idarə olunmasında da daha üstün nəticələr nümayiş etdirirlər.

Xüsusilə dinləmək bacarığı və qarşılıqlı etimad yaratmaq qabiliyyəti qadınları danışıqlarda fərqləndirən əsas xüsusiyyətlərdən biri kimi qiymətləndirilir.

Bu yanaşma qarşı tərəfin danışıqlara olan etimadını gücləndirərək prosesi sadəcə qısamüddətli alqı-satqı əməliyyatından çıxarıb uzunmüddətli əməkdaşlığa çevirir. Araşdırmaya əsasən, danışıqlardan sonra tərəflərin məmnunluq səviyyəsi qadınlarla aparılan danışıqlarda kişi danışıq tərəfdaşları ilə müqayisədə daha yüksək olur.

Münasibətlərin danışıqlardakı gizli rolu

"Proceedings of the National Academy of Sciences" jurnalında dərc olunan araşdırmanın müəllifi doktor Şarlot Taunsend bildirib ki, uzun illər aparılan tədqiqatlar əsasən kişi mərkəzli modellərə söykənib. Onun sözlərinə görə, nəticələr göstərir ki, qadınlar yalnız iqtisadi baxımdan uğurlu nəticələr əldə etmir, eyni zamanda qarşı tərəfin daha çox üstünlük verdiyi danışıq tərəfdaşına çevrilirlər.

Hətta iştirakçıların cinsiyyətinin anonim saxlanıldığı testlərdə belə, qadınların danışıq üslubu tərəfdaşlar tərəfindən daha müsbət qiymətləndirilib.

Qadınlar strateji sahələrdə daha fəaldır

Araşdırmaya görə, müasir dövrdə qadınların danışıqlara təşəbbüs göstərmə tezliyi əvvəlki illərlə müqayisədə əhəmiyyətli dərəcədə artıb. Bu isə əvvəllər daha çox "kişilərə xas" hesab edilən strateji sahələrdə qadınların artıq yüksək səriştə nümayiş etdirdiyini göstərir.

Tədqiqat müəllifləri hesab edirlər ki, maliyyə hədəflərinə nail olarkən işgüzar münasibətləri qoruyub saxlamaq müasir biznes mühitində uğurlu danışıqların əsas meyarlarından birinə çevrilib.

Paşa Məmmədli