"OpenAI" ABŞ hökumətinə şirkətdə 5 faizlik pay təklif edib

"OpenAI" ABŞ hökumətinə şirkətdə 5 faizlik pay ayrılmasını təklif edib.

Valyuta.az xəbər verir ki, təşəbbüs Vaşinqtonun süni intellekt şirkətlərinə artan siyasi və tənzimləyici təzyiqini azaltmağa yönəlib.

Məlumata əsasən, təklif "OpenAI"nin baş icraçı direktoru Sem Altman tərəfindən Donald Tramp administrasiyası ilə aparılan ilkin müzakirələr zamanı irəli sürülüb.

Altman hesab edir ki, dövlətin şirkətdə maliyyə marağının olması süni intellektin yaratdığı iqtisadi dəyərin cəmiyyətlə bölüşdürülməsi üçün ən effektiv mexanizmlərdən biridir.

"OpenAI"nin mart ayında başa çatan son investisiya raundundan sonra şirkətin bazar dəyəri 852 milyard dollara çatıb. Bu qiymətləndirmə əsasında hökumətə təklif olunan 5 faizlik payın dəyəri təxminən 42,6 milyard dollar təşkil edir.

Müzakirə edilən modelə əsasən, ABŞ hökuməti xüsusi dövlət investisiya fondu vasitəsilə yalnız "OpenAI"də deyil, həmçinin "Anthropic", "Google" və "Meta" kimi aparıcı Amerika süni intellekt şirkətlərində də 5 faizlik pay əldə edə bilər.

Lakin həmin şirkətlərin belə bir təşəbbüsə razılıq verib-verməyəcəyi hələ məlum deyil.

Məsələ ilə bağlı Ağ Ev, eləcə də "OpenAI", "Anthropic", "Google" və "Meta" hələlik rəsmi açıqlama verməyib.

Son aylarda ABŞ administrasiyası süni intellekt sektoruna nəzarəti gücləndirib. Buna kibertəhlükəsizlik riskləri, qabaqcıl süni intellekt modellərinin təhlükəsizliyi ilə bağlı narahatlıqlar və Çin şirkətlərinin daha ucuz açıq mənbəli modellərlə artan rəqabəti səbəb göstərilir.

"CNBC"nin daha əvvəl yaydığı məlumata görə, hökumətin "OpenAI"də pay sahibi olması ideyası bir ildən artıqdır müzakirə olunur.

Sem Altman bu konsepsiyanı ilk dəfə 2025-ci ilin əvvəlində Donald Tramp administrasiyasına təqdim edib. Şirkət bu ilin aprelində də süni intellekt sahəsində yaradılan iqtisadi dəyərin cəmiyyətə çatdırılması məqsədilə "ictimai sərvət fondu"nun yaradılmasını təklif etmişdi.

Qeyd edək ki, Donald Tramp administrasiyası strateji əhəmiyyət daşıyan bəzi özəl şirkətlərə dövlət sərmayəsi yatırılması təcrübəsinə malikdir.

ABŞ hökuməti ötən il "Intel"ə 8,9 milyard dollar investisiya qoyaraq şirkətdə 10 faizlik pay əldə edib. Donald Tramp daha sonra süni intellekt şirkətlərində dövlət payını amerikalıların bu texnoloji inqilabın birbaşa iştirakçısına çevrilməsi baxımından müsbət addım kimi qiymətləndirib.

Tənzilə Ağabalayeva