"Nvidia" bu il fərdi kompüterlər üçün öz prosessorlarını buraxacaq

“Nvidia” istehlakçı seqmenti üçün fərdi kompüter prosessorları bazarına çıxmağa hazırlaşır və bu il noutbuk çiplərinin öz xəttini təqdim edəcək.

Valyuta.az xəbər verir ki, bu barədə “The Wall Street Journal” nəşri öz mənbələrinə istinadən yazıb.

Mənbələrin bildirdiyinə görə, inkişaf paralel olaraq iki istiqamətdə aparılır. Birincisi – “MediaTek” ilə birgə ARM əsaslı SoC formatlı prosessorların yaradılması layihəsidir. Bu çiplərin “Dell” və “Lenovo” noutbuklarında istifadə olunması planlaşdırılır.

Bu həllər yalnız korporativ seqment üçün deyil, həm də oyunçular üçün maraqlı ola bilər. Bildirilir ki, “Nvidia” öz prosessorlarının ilkin olaraq x86 arxitekturası üçün hazırlanmış oyun və tətbiqlərlə uyğunluğu üzərində işləməyi planlaşdırır. Daha əvvəl “Microsoft” bəyan etmişdi ki, “Xbox Game Pass” kataloqundakı layihələrin 85%-dən çoxu artıq ARM prosessorlu “Windows” cihazlarında dəstəklənir.

İkinci istiqamət “Windows” əməliyyat sistemi ilə işləyən cihazlarda “Intel” prosessorlarının “Nvidia”nın qrafik və süni intellekt modulları ilə inteqrasiyası ilə bağlıdır. Ehtimal olunur ki, söhbət iki şirkət arasında tərəfdaşlıq çərçivəsində daha əvvəl qeyd olunan həllərdən gedir.

İlkin məlumata əsasən, yeni prosessorlarla təchiz olunmuş ilk modellərin qiyməti 1000–1500 ABŞ dolları aralığında olacaq. Mənbələr bildirir ki, onlar bazara 2026-cı ilin birinci yarısında çıxa bilər.

Aktual “Valve” statistikasına görə, “Steam” platformasında qeydiyyatdan keçmiş kompüterlərin 55%-i “Intel” prosessorlarından istifadə edir. “AMD”nin payı 45% təşkil edir və bu göstərici hər ay artır.

Paşa Məmmədli