Milyarder Larri Ellison Trampın qonşuluğuna köçdü

“Oracle”un həmtəsisçisi, 194 milyard dollarlıq sərvəti ilə dünyanın ən varlı şəxslərindən biri olan Larri Ellison əsas yaşayış ünvanını Havaydan Floridaya dəyişib.

Valyuta.az xəbər verir ki, 81 yaşlı milyarderin yeni rəsmi ünvanı Manalapan (Florida) şəhəridir. Bu ərazi ABŞ prezidenti Donald Trampın Palm Biçdə yerləşən "Mar-a-Lago" iqamətgahından təxminən 20 dəqiqəlik məsafədədir.

Ellison 2023-cü ildə seçici qeydiyyatını Floridaya keçirib və əsas yaşayış yerini rəsmi şəkildə dəyişib. Bildirilir ki, bu addım ona böyük həcmdə “Oracle” səhmlərini satmazdan əvvəl təxminən 1 milyard dollar ştat vergisinə qənaət etməyə imkan verib.

Qeyd olunur ki, son illərdə milyarder Floridada aktiv şəkildə daşınmaz əmlak alır. O, Manalapanda 173 milyon dollarlıq malikanə, həmçinin yüz milyonlarla dollar dəyərində digər obyektlər əldə edib.

Ellisonun şəxsi təyyarə uçuşlarının böyük hissəsinin də son illər Floridada qeydə alınması onun əsas vaxtını artıq bu ştatda keçirdiyini göstərir.

Sərvanə Rəmixanova