Niyə hər ay krediti ödəsək də, əsas borc azalmır?

Kredit götürən çox adam bir məqamda eyni sualla üz-üzə qalır: “Mən hər ay ödəyirəmsə, niyə borcum hiss olunacaq qədər azalmır?” Bu sual adətən cədvələ baxanda, ödənilən məbləğlə qalan borc arasında məntiq tapa bilməyəndə yaranır. Məsələ ondadır ki, kreditin işləmə prinsipi insanların gündəlik düşüncə tərzi ilə üst-üstə düşmür. Bankın hesabladığı ilə müştərinin gözləntisi arasında ciddi fərq var və bu fərq başa düşülmədikcə narazılıq qaçılmaz olur.

Bəs niyə hər ay kredit ödəyirəm, amma əsas borcum azalmır?

İqtisadçı Günay Hüseynova Valyuta.az-a bildirir ki, banklarda kredit sistemində annuitet və differensial qaydada ödəniş sistemi mövcuddur:

“İlk növbədə qeyd edim ki, əksər banklarda kredit sistemi annuitet qaydasındadır. Daha təfərrüatlı desək, bank bu yolla bir növ risklərdən özünü qoruyur. Məlumdur ki, problemli kreditlərin sayı kifayət qədərdir. Yeni müraciətçi də problemli kredit müştərisinə çevrilə bilər. Buna görə də bank ilk növbədə öz faizini əvvəldən təmin etməyə çalışır”.

“Yəni ola bilər ki, müştəri 24 aylıq kredit götürüb 4 aydan sonra ödənişi dayandırsın. Bu zaman bank həmin 4 ay üzrə ödənişləri əsasən faiz kimi almış olur. Qalan məbləğə yenidən faiz tətbiq olunur, gecikməyə görə isə əlavə faiz hesablanır. Kreditə müraciət edən müştəriyə ödəniş cədvəli təqdim olunur. Həmin cədvəldə aylar üzrə faiz məbləği və əsas borcun qalığı göstərilir” - deyə G. Hüseynova qeyd edir.

Tənzilə Ağabalayeva