Vençur kapital qurucusu Loqan Polun “Pokémon” kartını 16,5 milyon dollara aldı

Məşhur bloqer və restler Loqan Pol nadir “Pikachu Illustrator” kartını 16,492 milyon dollara sataraq kolleksiya bazarında yeni rekord müəyyən edib.

Valyuta.az xəbər verir ki, hərrac “Goldin” şirkəti tərəfindən təşkil olunub və qalib iştirakçı vençur kapital şirkəti “Solari Capital”ın təsisçisi EJ Skaramuççi olub. O, ABŞ-ın keçmiş Ağ Ev kommunikasiya direktoru Entoni Skaramuççinin oğludur. Hərrac Şərq vaxtı ilə gecə saatlarında başa çatıb.

Sözügedən “Pikachu Illustrator” kartı dünyada ən nadir “Pokémon” kartlarından biri hesab olunur. Kart əvvəlcə Yaponiyada keçirilmiş illüstrasiya müsabiqəsinin qaliblərinə təqdim edilib. Ümumilikdə 41 ədəd paylanıb və yalnız bir nüsxə kolleksiya qiymətləndirmə şirkəti “PSA” tərəfindən ən yüksək keyfiyyət dərəcəsi alıb. “Goldin” bu kartı kolleksiya sənayesinin “müqəddəs qraillərindən” biri adlandırıb.

Loqan Pol kartı 2021-ci ilin iyulunda 5,275 milyon dollara alaraq o dövrdə dünya rekordu müəyyən etmişdi. Son satış nəticəsində o, milyonlarla dollar mənfəət əldə edib. Kart həmçinin 75 min dollar dəyərində qiymətləndirilmiş brilyantlarla bəzədilmiş zəncirlə birlikdə təqdim olunub. Pol 2022-ci ildə “WrestleMania 38” tədbirində “WWE”də debütü zamanı kartı boynunda nümayiş etdirmişdi.

Yeni sahibi EJ Skaramuççi kartı daha geniş kolleksiya planlarının bir hissəsi kimi qiymətləndirib və gələcəkdə digər nadir tarixi və təbii eksponatları da almağı planlaşdırdığını bildirib.

Son illərdə “Pokémon”, “Magic: The Gathering” və “Yu-Gi-Oh!” kimi kolleksiya kartlarına maraq əhəmiyyətli dərəcədə artıb. Xüsusilə Z nəsli arasında nadir kartlara investisiya meyli güclənib və bəzi investorlar ənənəvi maliyyə alətləri əvəzinə bu bazara üstünlük verməyə başlayıblar.

Tənzilə Ağabalayeva