Biznesimiz üçün işıq gələn, yoxsa it hürən tərəfə getməliyik?

Famil Tağıyev
    MaxCreative şirkətinin rəhbəri

Azərbaycan xalq nağıllarından biri olan “Cırtdan”da maraqlı bir məqam var. Cırtdan iki yol arasında qalır: bir tərəfdən işıq gəlir, digər tərəfdə it hürür. İşıq gələn yol daha təhlükəsiz, daha rahat və daha məntiqli görünür. Cırtdan da məhz bu səbəbdən işıq gələn yolu seçir, amma həmin yolun sonunda onu div gözləyir.

Bu səhnə sadəcə uşaq nağılı deyil. Bu, əslində qərarvermə və risk oxuma dərsidir. Bugünkü biznes dünyasında da oxşar seçimlər edilir.

Bizneslər niyə “işıq yanan yolu” seçir?

Müasir biznes mühitində “işıq yanan yol” adətən belə görünür:

•    Sosial mediada aktiv olmaq
•    Daha çox görünürlük əldə etmək
•    Endirim kampaniyaları ilə satış artırmaq
•    Hamının etdiyi strategiyanı təkrarlamaq

Bu yol rahatdır. Çünki:
•    Nəticə tez görünür
•    İzah etmək asandır
•    Rəqəmlərlə ölçülür
•    “Hamı belə edir” arqumenti var

Amma çox vaxt bu yolun sonunda bizneslər divlə üz-üzə qalır:•    Qiymət asılılığı yaranır
•    Loyallıq formalaşmır
•    Satış yalnız kampaniya dövründə artır
•    Brend dəyəri zəifləyir

İşıq var, amma çıxış yoxdur.

“İt hürən yol” niyə qorxudur?
İt hürən yol səs-küylüdür, qorxudur və risklidir. Biznes üçün bu yol adətən belə təzahür edir:

•    Mobil tətbiq yaratmaq
•    Öz platformanı qurmaq
•    Müştəri datasını özünə məxsus etmək
•    Uzunmüddətli strategiya qurmaq
•    Səssiz, lakin davamlı dəyər yaratmaq

Bu yol:

•    Daha çox düşünmə tələb edir
•    Daxili sistemlərin dəyişməsini istəyir
•    Rəhbərlik səviyyəsində strateji baxış tələb edir
•    İlk mərhələdə sürətli nəticə vermir

Məhz buna görə bir çox biznes bu yolu seçmir. Amma bu yolun sonunda adətən div yox, yolun özü davam edir.
İşıq həmişə təhlükəsizlik demək deyil. Bizneslər tez-tez belə bir yanlışlığa düşür: “Əgər hər kəs bu yolu seçirsə, deməli, risk yoxdur”. Halbuki tarix göstərir ki:

•    Hamının endirim etdiyi bazarda qalib olmur
•    Hamının qışqırdığı yerdə səs dəyərsizləşir
•    Hamının eyni kanala güvəndiyi mühitdə asılılıq yaranır

Ən böyük risk bəzən ən parlaq görünən qərarların içində gizlənir.
Cırtdanın dərsi bu gün də aktualdır. Cırtdan işıq yanan yolu seçdi, çünki qorxmaq istəmədi. Bizneslər də çox vaxt riskdən qaçmaq üçün rahat qərarlar verir. Amma bəzən sualı belə vermək lazımdır: “Bu yol işıqlıdır, yoxsa doğrudan da təhlükəsizdir?”

Çünki real divlər çox vaxt işığın ən çox olduğu yerdə gizlənir. Bugünkü biznes mühitində qalib gələnlər:

•    daha az qışqıran
•    daha az endirim edən
•    daha çox düşünən
•    öz yolunu seçən brendlərdir.

Bəzən it hürən yolu seçmək cəsarət tələb edir. Amma uzunmüddətli dəyər məhz o yolda formalaşır.