Neft qiymətləri dayanmır: Analitiklərdən yeni proqnoz

Neft qiymətləri 13 mart səhər saatlarında yüksəlməyə davam edib və Brent markalı neftin qiyməti bir barel üçün 102 dollardan yuxarı ticarət edilib. ABŞ WTI nefti 1,84 dollar bahalaşaraq 97,57 dollar/barel təşkil edib.

Valyuta.az "Bloomberg"ə istinadən xəbər verir ki, investorlar İranın Hörmüz boğazını tamamilə bağlayacağına söz verməsindən sonra yeni şoklara hazırlaşırlar.

12 martda Beynəlxalq Energetika Agentliyi (BEA) xəbərdarlıq edib ki, neft təchizatındakı fasilələr tarixdəki ən böyükdür. Agentlik qeyd edir ki, Hörmüz boğazının demək olar ki, tam bağlanması dünya bazarına neft, təbii qaz və dizel tədarükünü dayandırıb və enerji qiymətlərini artırıb.

"Sparta Commodities" şirkətinin baş analitiki Filip Konz-Lyuks bildirir ki, BEA üzv ölkələrinin rekord həcmdə ehtiyat sərbəst buraxması neftin “stratosferik” səviyyəyə qalxmasının qarşısını qısa müddətlik alacaq, lakin uzunmüddətli təsiri şübhəlidir.

ABŞ 12 mart tarixinə qədər yüklənmiş Rusiya nefti və neft məhsullarının satışına müvəqqəti icazə verib. İcazələrin 11 aprel 2026-cı ilə qədər qüvvədə olması planlaşdırılır. ABŞ maliyyə naziri Skott Bessent X sosial şəbəkəsində yazıb ki, Rusiyaya qarşı sanksiyaların müvəqqəti ləğvi neft qiymətlərini endirmək məqsədi daşıyır.

Eyni zamanda, ABŞ-ın energetika naziri Kris Rayt bildirib ki, ABŞ Hərbi Dəniz Qüvvələri martın sonuna qədər tankerleri boğazdan müşayiət edə bilər. Lakin Xarici Siyasət Araşdırmaları İnstitutunun prezidenti Aaron Steyn buna şübhə ilə yanaşır: “Fəal döyüş əməliyyatları zamanı minaları zərərsizləşdirmək mümkün deyil və Hərbi Dəniz Qüvvələri boğaza girmək istəməz”.

Ekspertlər gözləyir ki, İrandakı müharibə bitənə qədər neftin qiyməti barreldə 85 dolların altına düşməyəcək. Steyn əlavə edir ki, 85–105 dollar aralığı qiymətlərin münaqişə bitənədək əsaslandırılmış diapazonudur.

Paşa Məmmədli