“Sunday” startapı 165 milyon dollar investisiya alıb

Evlərdə istifadə üçün humanoid robotlar hazırlayan “Sunday” 165 milyon dollar investisiya cəlb edib. 

Valyuta.az xəbər verir ki, 2024-cü ildə yaradılan şirkətin qiymətləndirilməsi 1,15 milyard dollara yüksəlib.

“Sunday” yeni investisiyanı ev işlərini yerinə yetirə bilən humanoid robotu “Memo”nun inkişafına və istehsal gücünün artırılmasına yönəldəcəyini açıqlayıb.

Şirkət Toni Jao (Tony Zhao) və Çenq Çi (Cheng Chi) tərəfindən təsis edilib. “Sunday”in məqsədi insanların gündəlik ev işlərində kömək edə biləcək süni intellekt dəstəkli robotlar hazırlamaqdır.

Şirkətin əsas məhsulu olan “Memo” paltarları qatlamaq, masanı yığışdırmaq və qabları yerləşdirmək kimi ev işlərini yerinə yetirə bilən robot kimi hazırlanır.

Ev işlərinin robotlar üçün çətin olmasının əsas səbəblərindən biri əşyaların çəkisi, teksturası və kövrəkliyi baxımından fərqli olmasıdır. Məsələn, bir dəsmalı və şərab qədəhini eyni həssaslıqla tutmaq robot sistemləri üçün mürəkkəb tapşırıq hesab olunur.

“Sunday Robotics” bu problemi həll etmək üçün robotları insan hərəkətlərindən əldə edilən məlumatlarla öyrədir. İnsanların ev işləri zamanı etdiyi hərəkətlər qeydə alınır və robotlar bu məlumatlar əsasında həmin hərəkətləri öyrənərək tətbiq edə bilir.

Şirkət evlər üçün etibarlı və praktik robot köməkçi hazırlamağı hədəfləyir. Süni intellekt sahəsində son illərdə əldə edilən inkişaflar sayəsində “Sunday Robotics” kimi startaplar uzun müddətdir müzakirə olunan şəxsi ev robot köməkçiləri ideyasını reallığa çevirməyə doğru irəliləyir.

Mayya Hüseynova