1 trilyon dollarlıq hüquq bazarında yeni investisiya dalğası: “Harvey” startaplara maliyyə ayırır

8 milyard dollar dəyərində qiymətləndirilən hüquqi texnologiya şirkəti “Harvey” yeni hüquqi texnologiya startaplarına investisiya etməyə başlayacağını açıqlayıb. Şirkət bu məqsədlə vençur kapitalisti Zak Poznerin yaratdığı “The LegalTech Fund” ilə tərəfdaşlıq quraraq hüquq firmaları və şirkətlərin hüquq komandaları üçün hazırlanacaq yeni texnologiyaların maliyyələşdirilməsini planlaşdırır.

Valyuta.az xəbər verir ki, “Harvey”in baş direktoru Uinston Vaynberqin sözlərinə görə, təxminən 1 trilyon dollar həcmində qiymətləndirilən qlobal hüquq bazarı çox böyük və parçalanmışdır. Buna görə də tək bir proqram təminatı şirkətinin bütün bazara hakim olması çətindir. Şirkət bu səbəbdən yalnız məhsul hazırlamaqla kifayətlənməyərək, perspektivli startapları maliyyələşdirməklə ekosistemin inkişafında rol almağı hədəfləyir.

Şirkət investisiyaları ayrıca fond yaratmadan, öz gəlirləri hesabına həyata keçirəcək. Planlara görə, hər bir startapa 2 milyon dollardan az məbləğdə investisiya qoyulacaq. Bu addım “Harvey”ə hüquq texnologiyaları sahəsində yeni məhsul və həllər yaradan şirkətlərlə erkən mərhələdə əməkdaşlıq qurmaq imkanı verəcək.

Bəzi hallarda bu investisiyalar tərəfdaşlığa çevrilə bilər və həmin startapların hazırladığı alətlər birbaşa “Harvey” platformasına inteqrasiya oluna bilər. Şirkət bildirir ki, belə əməkdaşlıqlarda əsas prioritet təhlükəsizlik və texniki uyğunluq olacaq. Digər tərəfdən, bəzi investisiyalar gələcək satınalmalar üçün ilkin addım kimi də qiymətləndirilir.

Məlumatlara görə, 2025-ci ildə hüquq sahəsi üçün texnologiyalar hazırlayan startaplara 4 milyard dollardan çox investisiya yatırılıb ki, bu da əvvəlki illə müqayisədə demək olar iki dəfə çoxdur. Bu vəsaitin böyük hissəsi “Harvey”, “Filevine” və “Clio” kimi iri şirkətlərə yönəlib. “Harvey” indiyədək “Sequoia Capital”, “A16z” və “OpenAI” kimi investorların iştirakı ilə ümumilikdə 1 milyard dollar maliyyə cəlb edib.

Ekspertlər hesab edirlər ki, süni intellektin inkişafı hüquq sahəsində yeni texnologiyaların sürətlə yayılmasına səbəb olur və bu bazarda yeni liderlərin formalaşması üçün hələ də geniş imkanlar mövcuddur. “Harvey”in startaplara investisiya strategiyası da məhz bu dəyişən bazarda mövqeyini gücləndirməyə yönəlib.

Tənzilə Ağabalayeva