Restoranlar müştərilərdən nəyi gizlədir?

Bəzən restoranlarda etdiyimiz seçimlərin hamısı tam sərbəst olmur. Menyuya baxarkən hansı yeməyi sifariş edəcəyimizi özümüz seçdiyimizi düşünsək də, əslində bir çox hallarda restoranların istifadə etdiyi psixoloji və marketinq üsulları bu qərara təsir edir. Menyunun quruluşundan tutmuş masaya gələn çörəyə, musiqinin ritmindən porsiya ölçülərinə qədər bir çox detal müştərinin davranışını yönləndirmək üçün düşünülmüş ola bilər.

Restoran biznesində bu cür strategiyalar həm satışları artırmaq, həm də xərcləri daha səmərəli idarə etmək üçün geniş istifadə olunur. Bəs restoranlar müştərilərdən hansı “kiçik sirləri” gizlədir?

Valyuta.az restoranların istifadə etdiyi bəzi maraqlı strategiyaları təqdim edir:

Yeni balıq illüziyası

“Günün balığı” hər zaman dənizdən yeni tutulmuş balıq demək deyil. Sektor standartlarına görə bir çox balıq məhsulu həftələr əvvəl dondurulur və yalnız sifarişdən əvvəl əridilərək hazırlanır. Bu üsul restoranlara məhsulu daha uzun müddət saxlamağa və tədarük prosesini asanlaşdırmağa imkan verir.

Niyə əvvəlcə çörək gətirilir?

Masaya gələn çörək çox vaxt sadəcə ikram deyil. Müştərilər gözləyərkən aclığı qismən azaltmaq və onları daha çox içki, məzə və əlavə yeməklər sifariş etməyə təşviq etmək üçün istifadə olunan bir taktikadır. Restoranlar üçün çörək ucuz məhsuldur, amma satışların artmasına kömək edə bilir.

Menyudakı “görünməz əl”

Araşdırmalar göstərir ki, insanlar menyuya baxarkən diqqətlərini adətən orta hissəyə və ya sağ yuxarı küncə yönəldirlər. Restoranlar isə ən çox qazanc gətirən yeməkləri məhz bu “qızıl nöqtələrdə” yerləşdirərək müştərinin seçimini şüuraltı şəkildə yönləndirirlər.

Porsiya və boşqab oyunu

Boşqabın ölçüsü porsiyanın necə göründüyünə ciddi təsir edir. Böyük boşqab kiçik porsiyanı daha az göstərir, kiçik boşqab isə eyni porsiyanı daha dolu və bol kimi təqdim edir. Bu vizual illüziya sayəsində restoranlar xərcləri azaltmaqla yanaşı, müştərinin doyma hissini də qoruyur.

“Şefin xüsusi seçimi”

Menyuda tez-tez gördüyümüz “şefin tövsiyəsi” və ya “günün yeməyi” hər zaman restoranın ən populyar yeməyi olmaya bilər. Bəzi hallarda bu ad, mətbəxdə artıq olan və tez istifadə edilməli məhsulların daha cazibədar şəkildə təqdim olunması üçün istifadə edilir.

Musiqinin ritmi və yemək tempi

Restoranlarda çalınan musiqə də təsadüfi seçilmir. Sürətli tempdə musiqi müştərilərin daha tez yeməsinə və masanı daha tez boşaltmasına səbəb ola bilər. Yavaş və sakit musiqi isə insanları daha uzun müddət oturmağa, əlavə içkilər sifariş etməyə və ümumi xərci artırmağa təşviq edir.

Qısa menyu strategiyası

Bəzi restoranların menyunu qısa saxlaması da təsadüfi deyil. Az sayda seçim müştərinin qərar verməsini asanlaşdırır, mətbəxdə iş prosesini sadələşdirir və qida israfını minimuma endirir. Bu yanaşma restoranın daha effektiv işləməsinə kömək edir.

Bütün bu nüanslar göstərir ki, restoranlarda seçim etdiyimizi düşünsək də, ətrafımızdakı bir çox detal bu qərarlara təsir edə bilir. Yəni bəzən masaya gələn yemək yalnız mətbəxdə deyil, menyu dizaynı, musiqi və psixologiya ilə birlikdə hazırlanmış bir strategiyanın nəticəsi olur.

Sərvanə Rəmixanova