Miras yolu ilə milyarder olanların sayı rekord həddə çatdı - SƏHƏR OXUSU

Qlobal sərvət paylanması son illərdə yeni istiqamət alıb. Bir tərəfdə texnologiya, maliyyə və istehsal sahələrində öz səyləri ilə milyarder olan iş adamları dayanırsa, digər tərəfdə miras hesabına sərvət zirvəsinə yüksələn yeni nəsil var. UBS-in 2025-ci il üzrə açıqladığı son hesabat isə bu tendensiyanı daha da aydın göstərir: miras yolu ilə milyarder olmaq artıq istisna deyil, artan qlobal fenomenə çevrilir.

Valyuta.az xəbər verir ki, UBS-in məlumatına görə, 2025-ci ildə dünyada milyarderlərin sayı 2 682 nəfərdən 2 919 nəfərə yüksəlib. Bu artımın ən diqqətçəkən tərəfi isə miras yolu ilə sərvət toplayanların sayındakı sıçrayışdır.

Bir ildə 91 yeni “miras milyarderi” yaranıb

Hesabata əsasən, təkcə son 12 ay ərzində 91 nəfər miras nəticəsində milyarder olub. Bu şəxslərə ümumilikdə 298 milyard dollar sərvət ötürülüb - bu isə ötən illə müqayisədə üçdə bir çoxdur və UBS-in 2015-ci ildən bəri aparılan araşdırmalarında ən yüksək göstəricidir.

Miras alanlar arasında ən çox diqqət çəkən nümunələrdən biri Asiyanın boya sənayesi maqnatı, avqust ayında 98 yaşında vəfat edən Goh Cheng Liangın ailəsidir. Onun altı nəvəsinin hər biri dəyəri 1 milyard dollardan çox olan səhmləri miras alaraq qısa müddətdə milyarder olub.

Öz zəhməti ilə zənginləşənlər də çoxdur, amma…

UBS bildirir ki, 2025-ci ildə 196 sahibkar öz biznes fəaliyyəti hesabına milyarder statusu qazanıb. Onların ümumi sərvəti 386,5 milyard dollar təşkil edir.

Lakin tendensiya göstərir ki, öz zəhməti ilə milyarder olmaq hələ də mümkündür, amma miras yolu ilə bir gecədə milyarder olmaq daha sürətlə yayılır. UBS rəsmisi Benjamin Cavalli bu prosesin növbəti illərdə daha da güclənəcəyini qeyd edir:

“Dünyada çoxillik sərvət ötürülməsi dövrünə qədəm qoymuşuq. Növbəti 15 ildə nəsillər arasında ən azı 5,9 trilyon dolların ötürüləcəyi gözlənilir”.

Mirasın coğrafiyası: ən çox varidat ABŞ-də ötürüləcək

Hesabat göstərir ki, nəsillərarası ən böyük sərvət transferi ABŞ-də baş verəcək. Ardınca Hindistan, Fransa, Almaniya və İsveçrə gəlir.

Böyük Britaniya siyahıda 7-ci yerdədir. Ölkədə növbəti 15 ildə 164 milyard dollar sərvətin miras qalacağı proqnozlaşdırılır.

Sərvanə Rəmixanova