"Microsoft" işdən çıxarılan əməkdaşlarına 39 həftəyədək kompensasiya ödəyəcək

"Microsoft" ABŞ-də ixtisar edilən əməkdaşlarına vəzifə və iş stajından asılı olaraq 39 həftəyədək əsas əməkhaqqı həcmində kompensasiya təklif edir.

Valyuta.az xəbər verir ki, şirkət iyulun 7-də dünya üzrə təxminən 4 800 nəfərin, yəni ümumi işçi qüvvəsinin 2,1%-nin ixtisar ediləcəyini rəsmən təsdiqləyib.

Təklif olunan paketə əsasən, ABŞ-də işdən çıxarılan əməkdaşlar minimum 60 gün ərzində əməkhaqqı almağa davam edəcəklər. Bundan əlavə, işçinin vəzifəsi və şirkətdəki iş stajı nəzərə alınmaqla kompensasiya müddəti 39 həftəyədək uzadıla bilər.
Şirkətin daxili təsnifatında 64-cü səviyyə ("Microsoft"un əməkdaşlar üçün istifadə etdiyi daxili vəzifə ) və aşağı vəzifələrdə çalışan əməkdaşlara hər 6 aylıq iş stajına görə 1 həftəlik, 65-67-ci səviyyələrdə çalışanlara isə hər 6 aylıq iş stajına görə 2 həftəlik əsas maaş məbləğində əlavə kompensasiya veriləcək. 68-ci səviyyə və daha yuxarı rəhbər heyət üçün isə ayrıca kompensasiya paketi nəzərdə tutulub.

Bununla yanaşı, 67-ci səviyyəyədək olan əməkdaşlar iş stajından asılı olaraq 6 və ya 12 ay ərzində səhmlərin hüquqi əldə edilməsini (stock vesting) davam etdirə biləcəklər. Paketə həmçinin 6 aylıq tibbi sığorta və əlavə 12 aylıq "COBRA" tibbi sığorta imkanları daxildir.

Qeyd olunur ki, bu şərtlər "Microsoft"un cari ilin əvvəlində könüllü təqaüd proqramı çərçivəsində təqdim etdiyi paketlə böyük ölçüdə eynidir. Fərq yalnız tibbi sığorta təminatının müddətinin bir qədər qısa olmasıdır.
İxtisarlar "Microsoft"un xərcləri optimallaşdırmaq və süni intellekt infrastrukturu üzrə iri investisiya planlarını maliyyələşdirmək strategiyasının tərkib hissəsidir. Şirkət bu il əsasən AI infrastrukturuna yönəldilmək üzrə 190 milyard ABŞ dolları həcmində kapital xərcləri planlaşdırır.

Ən böyük ixtisarlar satış bölməsi və "Xbox" oyun biznesini əhatə edəcək. "Microsoft"un İnsan Resursları üzrə direktoru Emi Koulmanın əməkdaşlara göndərdiyi məktuba əsasən, "Xbox" bölməsində də işçi sayının əhəmiyyətli hissəsi azaldılacaq.
Müqayisə üçün, "Salesforce" işdən çıxarılan əməkdaşlarına 9-30 həftə, "Oracle" maksimum 26 həftə, "Meta" isə 16 həftəlik əsas maaş və hər iş ili üçün əlavə 2 həftəlik kompensasiya ödəyir. Bu baxımdan "Microsoft"un təqdim etdiyi paket texnologiya sektorunda ən səxavətli kompensasiya proqramlarından biri hesab olunur.

Sərvanə Rəmixanova