Kripto investorları geri çəkilir: Son bir ayda bazardan 8 milyard dollar çıxıb

Kriptovalyuta bazarından son bir ay ərzində təxminən 8 milyard dollar vəsait çıxıb.

Valyuta.az xəbər verir ki, "Bitmain" şirkətinin həmtəsisçisi Cihan Vunun rəhbərlik etdiyi "BIT" şirkəti bununla bağlı hesabat yayımlayıb.

Analitiklər bazardan vəsait axınının azalmasının üç əsas səbəbini göstərərək, yeni kapital girişinin bərpası üçün ABŞ Federal Ehtiyat Sisteminin (FED) faiz endirimlərinə başlamasının vacib olduğunu bildiriblər.

"ETF"-lər, "Strategy" və stabilkoinlər

"BIT" analitiklərinin fikrincə, ABŞ-da "Bitcoin" spot "ETF"lərinə yönələn investisiyalar ötən illə müqayisədə əhəmiyyətli dərəcədə zəifləyib. Hesabatda qeyd olunur ki, kripto bazarı hazırda yüksəlişdən sonra korreksiya və istirahət mərhələsindən keçir.

Analitiklər bildirirlər ki, iri institusional investorların bazara marağı əvvəlki qədər güclü deyil. Eyni zamanda, "Strategy" şirkətinin dəstəyi ilə həyata keçirilən alışların təsiri də azalır. Daha əvvəl "Bitcoin" qiymətini ciddi şəkildə dəstəkləyən bu alışların zəifləməsi bazarda əlavə təzyiq yaradır.

Hesabatda həmçinin vurğulanır ki, 2025-ci il yüksəlişi dövründə "USDT" və "USDC" kimi stabilkoinlərin həcmi sürətlə artırdı və bu, bazara yeni dollar likvidliyinin daxil olduğunu göstərirdi. Hazırda isə vəziyyət fərqlidir:

“Likvidlik çatışmazlığı var. Bazara yeni vəsait daxil olmur. "Bitcoin"in yenidən yüksəlişə keçməsi üçün təzə kapital axınına ehtiyac var”, - deyə analitiklər qeyd ediblər.

"FED" gözləntilərdən daha sərt mövqe nümayiş etdirdi

"BIT" analitikləri bildirirlər ki, bazarlar "FED"in yeni sədri Kevin Warşın daha yumşaq monetar siyasət tərəfdarı olacağını gözləyirdilər. Bu gözləntilər riskli aktivlər, o cümlədən "Bitcoin" üçün müsbət amil hesab olunurdu.

Lakin "FED"in son açıqlamaları bazar iştirakçılarında məyusluq yaradıb. Bəzi "FED" rəsmiləri zərurət yaranacağı təqdirdə bu il faiz artımının da mümkün olduğunu bildiriblər. ABŞ-da inflyasiya səviyyəsi isə 4,2 faiz olaraq qalır ki, bu da "FED"in 2 faizlik hədəfindən xeyli yüksəkdir.

Korreksiya yay ayları boyunca davam edə bilər

Analitiklərin fikrincə, yüksək inflyasiya və "FED"in sərt mövqeyi səbəbindən kripto bazarında çətin dövrün yaxın aylarda da davam etməsi ehtimalı yüksəkdir.

Hesabatda qeyd olunur ki, yeni tarixi zirvələrin qısa müddətdə qeydə alınması çətin görünür. Bazarda bir neçə ay davam edə biləcək sakit və istiqamətsiz hərəkətlər müşahidə oluna bilər. Analitiklər hətta 2022-ci ildə yaşanan uzunmüddətli korreksiya dövrünə bənzər bir prosesin təkrarlanmasını da istisna etmirlər.

Sərvanə Rəmixanova