Xəstə xidmətlərini avtomatlaşdıran startap 30 milyon dollar investisiya cəlb edib

Madrid və Nyu-Yorkda fəaliyyət göstərən süni intellekt startapı "Prosper AI" 30 milyon dollar investisiya cəlb edib.

Valyuta.az xəbər verir ki, investisiya raunduna "Andreessen Horowitz" (a16z) rəhbərlik edib. Raunda həmçinin "Base10" qoşulub. Mövcud investorlar olan "Emergence Capital", "Y Combinator" və "Company Ventures" isə startapa yenidən maliyyə dəstəyi göstəriblər.

2023-cü ildə MIT və Harvard məzunları Xavyer de Qrasiya və Josep Minqot tərəfindən yaradılan "Prosper AI" səhiyyə müəssisələrinin inzibati proseslərini avtomatlaşdıran səs əsaslı süni intellekt həlləri hazırlayır.

Platforması xəstələrin zənglərini cavablandırır, görüşləri planlaşdırır, elektron tibbi qeydiyyat sistemində məlumatları emal edir, sığorta təminatını yoxlayır və hesablaşma proseslərini idarə edir.

"Prosper AI" bildirir ki, bu həll səhiyyə təşkilatlarının inzibati xərclərini 40 faizdən çox azaltmağa imkan verir.

ABŞ-da səhiyyə xərclərinin əhəmiyyətli hissəsi həkim qəbulundan əvvəl və sonrakı inzibati proseslərlə bağlıdır. Görüşlərin planlaşdırılması, sığorta yoxlamaları, ödənişlərin hesablanması və sığorta şirkətləri ilə əlaqələndirmə uzun illərdir ayrı-ayrı sistemlər vasitəsilə həyata keçirilir.

Araşdırmalara əsasən, ABŞ səhiyyə sistemində hesablaşma və sığorta ilə bağlı inzibati xərclər illik 400-496 milyard dollar arasında dəyişir.

"Prosper AI" ötən ilin sentyabrında 5 milyon dollarlıq ilkin investisiya raundunu tamamlamışdı. Şirkət həmin vaxtdan etibarən gəlirlərini beş dəfə artırdığını və 40-dan çox səhiyyə təşkilatını müştəri kimi cəlb etdiyini açıqlayıb.

Startapın müştəriləri arasında dermatologiya şəbəkəsi "Preferred Dermatology", Floridadakı "Jackson Memorial Hospital", elektron tibbi qeydiyyat platforması "Athenahealth" və səhiyyə ödəniş həlləri şirkəti "ImagineSoftware" yer alır.

Rəfiqə Abdin