45 dəfə rədd edilən startap bu gün uğur hekayəsidir

Bir çox sahibkar ilk uğursuzluqdan sonra ideyasından imtina edir. Lakin dünyanın ən tanınmış şirkətlərindən bəzilərinin hekayəsi göstərir ki, uğura gedən yol çox vaxt rədd cavablarından keçir.

Valyuta.az xəbər verir ki, vaxtilə investorlar tərəfindən dəfələrlə rədd edilən "Google", "Hotmail" və "Nutmeg" sonradan milyardlarla dollar dəyərində şirkətlərə çevrilməyi bacarıb.

"Google"u 1 milyon dollara almaq istəmədilər

Bu gün texnologiya nəhəngi olan "Google"un təsisçiləri Larri Peyc və Sergey Brin vaxtilə şirkəti cəmi 1 milyon dollara satmağa çalışıblar.

Stenford Universitetində təhsil alan gənc sahibkarlar axtarış sistemi üzərində işləməklə yanaşı təhsillərini davam etdirməyin çətin olduğunu düşünərək "Google"u satmaq qərarına gəliblər. Onlar təkliflə "Excite" şirkətinin rəhbəri Corc Bellə müraciət etsələr də, təklif rədd olunub.

Daha sonra tərəflər arasında danışıqlar aparılıb və qiymət 750 min dollara qədər enib. Bu dəfə isə təklifi "Google"un təsisçiləri qəbul etməyiblər. Onlar şirkətin satılmasını deyil, investisiya yatırılmasını istəyiblər.

Cəmi beş ay sonra iki şirkət "Google"a 25 milyon dollar investisiya yatırmağa razılaşıb. Bu gün isə "Google" dünyanın ən dəyərli texnologiya şirkətlərindən biridir.

"Nutmeg" 45 dəfə rədd edildi

Böyük Britaniyanın aparıcı investisiya platformalarından biri olan "Nutmeg" də uğura asanlıqla nail olmayıb.

Şirkətin təsisçisi Nik Hanqerford 2010-cu ildə onlayn investisiya idarəetmə platformasını yaratdıqdan sonra maliyyə dəstəyi axtarmağa başlayıb. Lakin həmin dövrdə investorlar yalnız onlayn fəaliyyət göstərən investisiya şirkəti ideyasına şübhə ilə yanaşıblar.

Hanqerford investisiya almaq üçün keçirdiyi ilk 45 görüşdə rədd cavabı alıb. Bəzi investorlar ideyanın maraqlı olduğunu desələr də, onun bu işi həyata keçirmək üçün uyğun şəxs olmadığını düşünürdülər.

Maliyyə çətinlikləri ilə üzləşən sahibkar hətta dostunun qarajında qalır, yerdə yatırdı. O, 2010-cu ilin sonuna qədər investisiya tapa bilməsə, layihədən imtina edib adi işə qayıtmağı planlaşdırmışdı.

Lakin 46-cı görüş taleyini dəyişdi. Vençur kapitalisti Tim Dreyper şirkətə investisiya yatırmağa razılaşıb. Bundan sonra "Nutmeg" sürətlə inkişaf edib və hazırda Böyük Britaniyanın ən sürətlə böyüyən maliyyə texnologiyaları şirkətlərindən biri hesab olunur.

"Hotmail"a 20 dəfə "yox" deyilib

Bu gün "Outlook" adı ilə tanınan "Hotmail" də investorlar tərəfindən dəfələrlə rədd edilən layihələrdən biri olub.

"Hotmail" 1996-cı ildə Cek Smit və Səbir Bhatia tərəfindən yaradılıb. Bhatia internet brauzeri vasitəsilə istifadə edilə bilən elektron poçt xidməti ideyasını irəli sürsə də, investorlar bu layihəyə riskli yanaşıblar.

Nəticədə sahibkarlar müraciət etdikləri çoxsaylı investorlardan mənfi cavab alıblar. Layihə ümumilikdə 20 dəfə rədd edildikdən sonra "Draper Fisher Jurvetson" şirkəti 300 min dollar investisiya ilə maliyyələşdirməyə razılaşıb.

"Hotmail" qısa müddətdə böyük populyarlıq qazanıb və 1998-ci ildə "Microsoft" tərəfindən 400 milyon dollara satın alınıb. Hazırda Outlook.com adı ilə fəaliyyət göstərən platformanın yüz milyonlarla istifadəçisi var.

Sərvanə Rəmixanova